SBASHK në lidhje me fenomenin e fundit të lëndimit të nxënësve në shkollat e Kosovës, ka paralajmëruar se së bashku me disa profesorë të Departamentit të Gazetarisë të Universitetit të Prishtinës ka përgaditur një program trajnimi për edukimin medial për mësimdhënësit me qëllim që ata të marrin njohuri të reja për rolin e mediave.
“Duke e parë se nxënësit me të madhe po përdorin mediat sociale, SBASHK në bashkëpunim me profesorë të Departamentit të Gazetarisë të Universitetit të Prishtinës kishte përgaditur një program trajnimi për edukimin medial, që i dedikohej mësimdhënësve me qëllim që ata të marrin njohuri të reja për rolin e mediave dhe ato njohuri ti bartin te kolegët, dhe tek nxënësit e tyre”, njofton SBASHK, përcjell EO.
Sipas këtij dikasteri, ky trajnim ka interes të madh për realizim.
Mundesh me e lexu edhe…
“Ky trajnim ishte licensuar nga Këshilli Shtetëror i Licencimit të Mësimdhënësve dhe mbahej nga profesorë të nderuar të gazetarisë. Ky trajnim kishte zgjuar interesim të madh te mësimdhënësit dhe organizohej me mjete modeste të SBASHK-ut falë angazhimit, thuaja vullnetar, të profesorëve të gazetarisë”, thuhet në njoftim.
SBASHK i bënë thirrje Ministrisë së Arsimit, Shkencës, Teknologjisë të ndryshojë kurrikulëm dhe ta bëjë lëndën Edukimi për Media ndër lëndët obligative.
“Tanimë, duke parë nevojën e nxënësve që të fitojnë shkathtësi për tu përballë me rreziqet që shfaqen nga përdorimi i mediave sociale, i bëjmë thirrje Ministrisë së Arsimit, Shkencës, Teknologjisë dhe Informacionit, që ta ndryshoj kurrikulën dhe ta shndërroj lëndën e Edukimit Medial në lëndë obligative në sistemin parauniveristar. Ky ndryshim, mundëson që nxënësit të jenë më të shkathtë dhe me të mbrojtur nga rreziqet potenciale që shfaqen në mediat sociale të cilat kanë një përdorim përdorim të gjerë tëk fëmijët”, thuhet tutje në njoftimin e SBAHSK-ut.
Pse edukimi medial?
Zhvillimi i madh dhe i shpejtë teknologjikë ka mundësuar edhe një zhvillim të hovshëm të mediave, duke i dhënë hapësirë secilit pjesëtarë të shoqërisë që të ketë qasje në të gjitha këto lloje të mediave në mënyrë të pavarur dhe të jetë pjesëmarrës aktiv në të. Hapësira e ofruar për qasje në mediat dhe rrjete sociale, ka bërë që shoqëria të përballet më një mori informatash dhe përmbajtjesh të ndryshme mediale.
Kjo ia ka dhënë secilit prej nesh mundësinë të krijojë dhe publikojë informacione dhe përmbajtje të ndryshme mediale në platforma të caktuara, të cilat konsumohen nga ne në baza shumë të shpeshta ditore. Po ashtu, edhe mediat e kanë ndryshuar mënyrën e funksionimit të tyre, duke ndikuar në përgatitjen e informacioneve dhe mënyrën e dhënies së tyre. Shtimi i portaleve të ndryshme dhe shpërndarja e informacioneve nga e ana tyre në baza shpeshta e ka bërë të pakontrollueshëm tregun e mediave online dhe të informacionit, në përgjithësi.
Si rezultat i kësaj, kanë dalë në shesh edhe shume portale të dyshimta, si dhe faqe të ndryshme në rrjete sociale, të cilat pretendojnë se bartin informacion te audienca, por që nuk kanë një organizim brenda vetes, në mënyrë që të kenë kredibilitet për punën që e bëjnë. Kjo, në fakt, ua ka hapur rrugën edhe formave të çrregullimit informativ, ku shoqëria shpesh ballafaqohet me lajme të rreme, dezinformata, manipulim të fakteve e, sidomos, me artikuj clickbait. Ky çrregullim informativ ndikon edhe në kredibilitetin e mediave, duke e shtuar mosbesimin në to nga publiku. Njëkohësisht, kjo ka mundësuar që këto forma të çrregullimit informativ të përdoren me qëllime politike, për përfitime financiare dhe për të ndjekur politika ose agjenda me ndikim të jashtëm.
Në Kosovë, rreth 90 për qind e personave mbi 16 vjeç e shfrytëzojnë internetin dhe mbi 75 për qind përdorin rrjete sociale. Dhe, përderisa është e vërtetë të thuhet se ka diversifikim mediash, që janë më dinamike dhe se kjo i jep fuqizim lirisë së medias, të rinjtë duhet të jenë të vetëdijshëm se tash duhet të jenë edhe më të vetëdijshëm nga rreziqet dhe kurthet në të cilat mund të bien lehtë. Kjo shumësi informacionesh dhe përmbajtjesh nuk i lë hapësirë njeriut të njoftohet mirëfilli për ato se çka po ndodhë nëse nuk edukohet që të bëjë selektime të caktuara dhe të ketë qasje kritike ndaj asaj që sheh dhe lexon./Katror.info
Përgatiti:
