Për shtatë ditë me radhë, duke filluar nga sot, Tirana do të jetë nikoqire e Festivalit të Teatrit Shqiptar “Moisiu”. Me shfaqje nga Teatri Kombëtar i Kosovës, Teatri i Shkupit dhe Teatri Kombëtar i Shqipërisë, për herë të dytë do të bëhet bashkimi artistik ndërteatror.
Në një prononcim të përbashkët, drejtuesit e këtyre teatrove të shquar, Adem Karaga (Teatri Shqiptar i Shkupit), Altin Basha (Teatri Kombëtar i Shqipërisë) dhe Kushtrim Sheremeti (Teatri Kombëtar i Kosovës), theksuan rëndësinë e këtij festivali për zgjerimin e bashkëpunimit ndërmjet vendeve tona në fushën e teatrit. Ata shpresojnë që kjo ngjarje do të sjellë më shumë bashkëpunim mes brezave të ndryshëm, aktorëve të rinj dhe ata me përvojë, si dhe do të kultivojë shijet estetike të publikut.
Festivali do të sjellë takime dhe debate me fokus në përmirësimin e artit teatror, si dhe mësimet që mund të nxirren nga përvoja e dy edicioneve të mëparshme.
Mundesh me e lexu edhe…
Shfaqjet në kuadër të festivalit do të jenë të hapura për publikun, dhe kjo do të japë mundësinë për të ndjekur nga afër punën e regjisorëve, aktorëve, skenografëve, kostumografëve dhe kompozitorëve.
“Ne kemi dramën shqipe që sivjet është mbi 60% të pjesëmarrjes në festival. E konsideroj si arritje të madhe këtë gjë, madje edhe faktin që co-produksioni mes tre teatrove tona është i bazuar mbi një dramë shqipe”, ka theksuar në konferencë për media drejtori i Teatrit Kombëtar të Shqipërisë, Altin Basha.
Edicioni i dytë i “Moisiu-t” do të përfundojë me një produksion të përbashkët të tre teatrove, shfaqja “Shtëpia e Zotit”, me autor Ledian Gjeçi dhe regji nga Ilir Bokshi. Kjo shfaqje është jashtë konkurrencës dhe do të sjellë një përmbledhje të pasur të talenteve teatrale.
estivali “Moisiu” është një manifestim kulturor i rëndësishëm që po shënon sukses të përbashkët në fushën e teatrit në rajonin shqiptarë. Këtëvit, festivali po mbështetet nga Ministritë e Kulturës të Republikës së Kosovës, Republikës së Shqipërisë dhe Republikës së Maqedonisë së Veriut.
Gjatë këtij festivali do të ndahen çmime të ndryshme, duke përfshirë shfaqjen më të mirë, regjinë më të mirë, aktorin dhe aktoren më të mirë, si dhe shpërblime të tjera të rëndësishme për krijimtarinë teatrore, duke përfshirë edhe çmimin për karrierën e një artisti të shquar në fushën e dramës shqiptare.
E gjithë historia e këtij festivali, filloi vitin e kaluar me bashkëpunimin e Teatrit Kombëtar të Kosovës, Teatrit Kombëtar të Shqipërisë dhe Teatrit Shqiptar të Shkupit.
Nga gara do të ndahen gjithsej 12 çmime. Vitin e kaluar edicioni i parë i këtij festivali është mbajtur në Shkup, sivjet në Tiranë e vitin e ardhshëm mbahet në Prishtinë, duke funksionuar si rotacion mes tri qyteteve shqiptare./Katror.info
Përgatiti:
