Komisioni Qendror i Zgjedhjeve të enjten ka nisur publikimin e rezultateve për kandidatët për deputetë.
“Ju njoftojmë se pas numërimit të votave të kandidatëve për deputetë dhe verifikimit të rezultateve të subjekteve politike nga formularët e rezultateve të plotësuar në vendvotime, proces i cili është zhvilluar dhe po vazhdon në Qendrat Komunale të Numërimit, në platformën elektronike https://rezultatet2025.net janë publikuar rezultatet për subjektet politike dhe kandidatët për deputetë. Në këto rezultate janë përfshirë të dhënat nga 2,290 (90.41%) nga 2,533 vendvotimet e numëruara deri më tani në Qendrat Komunale të Numërimit dhe se rezultatet e vendvotimeve tjera do të publikohen në mënyrë progresive. Po ashtu, në këto rezultate nuk përfshihen rezultatet e votave me kusht, votave të personave me nevoja të veçanta dhe votave nga votimi jashtë Kosovës, numërimi i të cilave do të bëhet gjatë ditëve në vazhdim në Qendrën e Numërimit dhe Rezultateve”, ka shkruar në Facebook, zëdhënësi i KQZ-së, Valmir Elezi, shkruan RTK.
Ndërkaq Komisioni Qendror i Zgjedhjeve ka procesuar 100 për qind të rezultateve për partitë politike të dala nga zgjedhjet e 9 shkurtit në Kosovë nxjerrë nga 2 mijë e 533 vendvotime sa kishte në total në ditën e zgjedhjeve.
Mundesh me e lexu edhe…
Sipas këtyre rezultateve preliminare, Vetëvendosje ka marrë 40.80 për qind të votave apo 342 mijë e 281 vota, Partia Demokratike e Kosovës ka marrë 22.3 për qind, apo 184 mijë e 811 vota, Lidhja Demokratike e Kosovës ka marrë 17.63 për qind, apo 147 mijë e 888, ndërkaq koalicioni AAK–Nisma ka marrë 7.46 për qind, apo 62 mijë e 588 vota.
Certifikimi i këtyre rezultateve nga KQZ-ja pritet të bëhet vetëm atëherë kur të përmbyllet në tërësi numërimi i votave, fillimisht atyre për deputet, pastaj votave nga diaspora, votave me kusht e atyre të personave me nevoja të veçanta./Katror.info
Përgatiti:
