Gjithçka duhet të dini rreth raportit të Komisionit Evropian për Kosovën

Komisioni Evropian e publikoi të mërkurën raportin vjetor të progresit për vendet që synojnë anëtarësimin në BE.

Në dokumentin për Kosovën thuhet se autoritetet e vendit mbeten të përkushtuara ndaj rrugës drejt integrimit evropian.

Duke përmendur se Kosova ka dorëzuar aplikimin për anëtarësim në BE në dhjetor të vitit 2022, raporti thekson se Komisioni është i gatshëm të përgatisë një opinion për aplikimin e saj, kur kjo të kërkohet nga Këshilli.

Gjithashtu, kujtohet se që nga 1 janari i këtij viti, mbajtësit e pasaportave biometrike të Kosovës kanë të drejtën e udhëtimit pa viza drejt BE-së, ndërsa që nga tetori, këtë të drejtë e kanë edhe poseduesit e pasaportave të Serbisë, të lëshuara nga Drejtoria Koordinuese Serbe.

Raporti nënvizon se tensionet në veri të Kosovës kanë vazhduar si pasojë e sulmit të dhunshëm ndaj Policisë së Kosovës nga sulmues të armatosur serbë, më 24 shtator të vitit 2023.

Sipas tij, Kosova ka shënuar përparim në luftën kundër krimit të organizuar, ndërsa mjedisi i biznesit në vend është përmirësuar, po ashtu.

Në këtë dokument, Kosova inkurajohet t’i intensifikojë përpjekjet e saj për të forcuar sundimin e ligjit dhe administratën publike, si dhe për të mbrojtur lirinë e shprehjes.

Aty thuhet, po ashtu, se Qeveria duhet të punojë për të krijuar mbështetje politike ndërpartiake për t’i ndjekur në mënyrë më efektive reformat që lidhen me BE-në.

“Kosova duhet ta zbatojë Marrëveshjen për Rrugën e Normalizimit dhe Aneksin e saj dhe të gjitha marrëveshjet e kaluara pa vonesa apo parakushte të mëtejshme”, thekson po ashtu Raporti i Progresit.

Kërkesë të ngjashme, Komisioni Evropian bën edhe në Raportin e Progresit për Serbinë.

“Marrëveshja është e vlefshme dhe ligjërisht e detyrueshme për palët dhe të gjitha formalitetet, përfshirë miratimin apo ‘formalizimin’ e saj, nuk duhet ta pengojnë progresin në zbatimin e saj”, theksohet në Raportin e Progresit për Serbinë.

Të dyja vendet porositen se normalizimi i marrëdhënieve mbetet kusht thelbësor në rrugën e tyre evropiane dhe se të dyja rrezikojnë të humbasin mundësi të rëndësishme, në mungesë të përparimit në këtë drejtim.

Kurti, përmes një postimi në Facebook, ka thënë se në asnjë fushë të vlerësuar nga kriteret themelore dhe EU Acquis nuk ka regres.

“Vetëm në dy fusha nuk ka progres, e në të gjitha të tjerat, 35 sosh gjithsej, ka progres, ku më shumë e ku më pak. Në 10 prej tyre kemi progres të mire”, ka shkruar Kurti, transmeton Telegrafi.

Më tej ai ka thënë se “në tri vitet e fundit, kemi arritur mbi 70% në zbatimin e Agjendës për Reforma Evropiane. Jemi vlerësuar pozitivisht në përafrimin me politikën e jashtme të BE-së si dhe sukseset në bashkëpunimin rajonal, duke përfshirë përfaqësimin në CEFTA dhe avancimin e Tregut të Përbashkët Rajonal, kjo e fundit tashmë si shtyllë e dytë e Planit të Rritjes”.

“Raporti thekson angazhimin dhe përparimin tonë të palëkundur në rrugën drejt integrimit në BE, si dhe përafrimin tonë me legjislacionin dhe vlerat Evropiane. I mirëpresim rekomandimet e raportit, adresimi i të cilave është i rëndësishëm për ne, jo vetëm në rrugëtimin drejt përparimit në procesin e integrimit evropian, por para se gjithash për përparimin e mëtutjeshëm socio-ekonomik të vendit tonë”, ka shkruar kryeministri.

Kurti ka thënë se “anëtarësimi në BE mbetet synimi strategjik i yni dhe gati dy vjet pas aplikimit tonë, është koha që Kosova të vlerësohet në kushte të barabarta për ta marrë statusin e kandidatit, të cilin e meritojmë”.

Ndërsa Shefi i Zyrës së Bashkimit Evropian në Kosovë, Aivo Orav, me rastin e dorëzimit të Raportit të Komisionit Evropian për Kosovën për vitin 2024, ka deklaruar sot se Përfaqësuesi i Lartë i BE-së, Josep Borrell, ka rekomanduar heqjen e masave ndaj Kosovës, ndërsa diskutimet me anëtarët e Këshillit janë ende në proces.

Orav vuri në dukje se Bashkimi Evropian ka marrë një drejtim të ri për zgjerim, por theksoi se Kosova dhe vendet e Ballkanit Perëndimor duhet të zgjidhin disa çështje të brendshme përpara se të bëjnë hapa të mëtejshëm.

“Aderimi në BE është një çështje shumë e rëndësishme. Për BE-në është detyrim t’i përgjigjet historisë. Sot, bota po përballet me një rikthim të luftës për shkak të agresionit rus në Ukrainë. Ky hov i ri për zgjerim vjen në momentin e duhur – së fundmi kemi nisur negociatat me Shqipërinë pas shumë vitesh pune”./Katror.info