Të hënën në Washington nis një nga gjyqet më të rëndësishme për çështje monopoli ndaj gjigantit të rrjeteve sociale, Meta.
Autoriteti amerikan për konkurrencën dhe mbrojtjen e konsumatorit (FTC) pretendon se Meta, e cila tashmë zotëronte Facebook-un, bleu Instagram-in në vitin 2012 dhe WhatsApp-in në 2014 me qëllim që të eliminonte konkurrencën dhe të krijonte një monopol, shkruan BBC, përcjell Katror.info.
Edhe pse FTC e kishte shqyrtuar dhe miratuar këto blerje në atë kohë, ishte zotuar se do të vëzhgonte pasojat e tyre. Nëse Komisioni Federal i Tregtisë e fiton këtë proces gjyqësor, CEO i Metës, Mark Zuckerberg, mund të detyrohet të shesë si Instagram-in ashtu edhe WhatsApp-in.
Mundesh me e lexu edhe…
“Argumenti i FTC-së është se blerja e Instagram-it ishte një mënyrë për ta neutralizuar një kërcënim të ri konkurrues ndaj Facebook-ut,” shpjegon profesorja e së drejtës së konkurrencës në Fakultetin Juridik të Vanderbilt-it, Rebecca Haw Allensworth.
Ajo thotë se fjalët e vetë Zuckerberg-ut, përfshirë email-et e tij, mund të jenë ndër provat më bindëse në këtë proces.
“Ai kishte thënë: ‘më mirë të blesh sesa të konkurrosh’. Është vështirë të jesh më i qartë se kaq,” thotë Allensworth.
Meta nga ana tjetër pritet të argumentojë se qëllimi i blerjes nuk është elementi kryesor në një rast kundër monopolit.
“Ata do të thonë se pyetja e vërtetë është: a janë konsumatorët më mirë si rezultat i kësaj bashkimi? Dhe do të sjellin prova se Instagram-i u zhvillua falë pronësisë nga Facebook-u,” shton ajo.
Mark Zuckerberg dhe ish-shefja operacionale e kompanisë, Sheryl Sandberg, pritet të dëshmojnë gjatë gjyqit, i cili mund të zgjasë për disa javë.
Meta ka deklaruar më parë se është e bindur se do të fitojë, dhe ekspertë kanë thënë për BBC-në se ajo pritet të argumentoje se përvoja e përdoruesve të Instagram-it është përmirësuar që kur platforma u ble./Katror.info
Përgatiti:
