Ministria e Kulturës, Rinisë dhe Sportit ka hapur thirrjen publike për mbështetje financiare për blerjen dhe botimin e librave, si dhe për botimin e revistave letrare për vitin 2025. Ky program ka për qëllim promovimin dhe mbështetjen e veprave me vlerë letrare, artistike dhe kulturore, duke inkurajuar përkthime dhe veprat e autorëve të spikatur, shkruan Katror.info.
Përmes konkursit për blerjen e librave, do të mbështeten vepra me vlerë letrare, artistike dhe kulturore, përkthime që paraqesin arritje të përgjithshme artistike dhe vepra të botuara në dy vitet e fundit nga botues të regjistruar në Kosovë.
Nga ana tjetër, konkursi për botimin e librave mbështet veprat e pabotuara të të gjitha gjinive letrare, përkthimet e veprave të rëndësishme dhe përkthimet e veprave vendore në gjuhë të huaja, si dhe kompletet e veprave të zgjedhura të autorëve të spikatur. Përkrahja financiare është gjithashtu e disponueshme për botimin e revistave letrare që kultivojnë vlera letrare, artistike dhe kulturore.
Mundesh me e lexu edhe…
Ftohen autorët, botuesit dhe redaktorët e revistave letrare që të dorëzojnë projektet e tyre së bashku me dokumentacionin e kërkuar deri më 03 mars 2025, në orën 16:00, në Arkivin e Ministrisë së Kulturës, Rinisë dhe Sportit.
“Ky është një hap i rëndësishëm për zhvillimin dhe pasurimin e skenës letrare dhe kulturore në vend, duke u ofruar mundësi autorëve dhe botuesve që të kontribuojnë në pasurimin e trashëgimisë letrare dhe kulturore të Kosovës”, thuhet në njoftimin e Ministrisë së Kulturës./Katror.info
Përgatiti:
