Nga 1 gushti, Festivali Ndërkombëtar i Artit në Hapësira Publike “HAPU” do të përhapë gjallëri në qytetin e Gjakovës, përpara se të zhvendoset në Prishtinë në ditët në vijim. Edicioni i 11-të sjell artistë nga Franca, Gjermania dhe Portugalia, duke mbajtur gjallë frymën e festivalit: bashkimi i natyrës me artin përmes performancave në ambiente të hapura.
Festivali nis në parkun “Ali Podrimja” me një performancë nga Juan Ignacio Tula, artist cirku me rrënjë franceze dhe argjentinase, i njohur për koreografitë e tij hipnotizuese me rrotën cyr. Në të njëjtën hapësirë, artisti gjerman Frank Bölter do të realizojë punime gjigande origami, duke ftuar qytetarët në një bashkëkrijim të veçantë.
Ansambli francez “Tac o Tac” do të prezantohet me performancën “Take off”, e cila do të luhet fillimisht në Gjakovë dhe më pas në sheshin “Skënderbeu” në Prishtinë. Aktivitetet vazhdojnë me origamitë e Bölter më 4 dhe 5 gusht në sheshin “Zahir Pajaziti”, ku ndërveprimi me publikun do të jetë thelbësor.
Mundesh me e lexu edhe…
Në përmbyllje të festivalit, grupi portugez “Mimo’s Dixie Band” do të performojë në bulevardin “Nënë Tereza” dhe në sheshin “Zahir Pajaziti”, me një shfaqje dinamike që ndërthur muzikën, teatrin dhe cirkun, duke rikrijuar atmosferën e rrugëve të Nju Orlinsit.
Sipas drejtorit artistik Florent Mehmeti, këtë vit veçanti është bashkëpunimi me “Fondacionin për Gjakovën” dhe sfidat e koordinimit me ngjarje të tjera në hapësira publike si “Akull n’verë”. Ai shprehet optimist se ky edicion do të sjellë përjetime të paharrueshme dhe një reflektim mbi lidhjen mes artit dhe natyrës.
Festivali “HAPU” vazhdon të jetë një platformë që transformon hapësirat urbane në vende të dialogut artistik ndërkombëtar, duke e sjellë publikun në zemër të ngjarjes../Katror.info
