Kolegji Publik Ndërkombëtar i Biznesit në Mitrovicë (IBCM) ka njoftuar në një postim në rrjetet sociale se është bërë pjesë e Aleancës prestigjioze Q-Helix, e cila është zyrtarisht e njohur si një nga 73 Aleancat e Universiteteve Evropiane nën Strategjinë Evropiane për Universitetet, shkruan Katror.info.
Ky zhvillim, siç thekson IBCM, “shënon një arritje historike për arsimin e lartë në Kosovë”, pasi institucioni është i vetmi nga vendi që bëhet pjesë e këtij rrjeti të gjerë, që përfshin mbi 650 universitete nga e gjithë Evropa. “Kjo Aleancë synon të riformësojë të ardhmen e arsimit përmes ekselencës, inovacionit dhe bashkëpunimit ndërkufitar,” thuhet në njoftimin e kolegjit.
Sipas IBCM-së, pjesëmarrja në Q-Helix do të ndihmojë në “forcimin e mobilitetit të studentëve, rritjen e kapaciteteve kërkimore dhe thellimin e bashkëpunimit institucional ndërmjet universiteteve evropiane.” Aleanca Q-Helix bashkon universitete dhe aktorë kyç nga akademia, industria, qeveria dhe shoqëria civile, duke ndërtuar një qasje gjithëpërfshirëse drejt arsimit të qëndrueshëm dhe zhvillimit shoqëror.
Mundesh me e lexu edhe…
“Përmes këtij angazhimi, IBCM riafirmon misionin për të ndërtuar ura bashkëpunimi, për të promovuar arsim cilësor e gjithëpërfshirës, dhe për ta pozicionuar Kosovën si një kontribuese aktive në peizazhin akademik dhe inovativ evropian,” theksohet më tej në njoftim.
Në fund, kolegji shpreh mirënjohje për të gjithë partnerët e Aleancës Q-Helix për “përkushtimin dhe bashkëpunimin në arritjen e këtij suksesi të rëndësishëm,” duke shtuar se “bashkë do të vazhdojmë të avancojmë arsimin e lartë evropian – më të qëndrueshëm, vizionar dhe gjithëpërfshirës.”/Katror.info
Përgatiti:
