Indeksi i Çmimeve të Ushqimit të FAO-së, një indikator i rëndësishëm për zhvillimet globale të çmimeve të mallrave ushqimore, mbeti kryesisht i pandryshuar në mars, duke pasuar vlerën e tij të rishikuar në shkurt, shkruan Katror.info.
Sipas raportit të fundit të Organizates së Ushqimit dhe Bujqësisë e Kombeve të Bashkuara (FAO), rënia e çmimeve botërore të drithërave dhe sheqerit kompensoi rritjen e çmimeve të vajit vegjetal.
Indeksi arriti në 127.1 pikë gjatë marsit, duke shënuar një rritje prej 6.9 për qind krahasuar me të njëjtin muaj të vitit të kaluar, por duke mbetur 20.7 për qind më poshtë nga niveli rekord i marsit 2022.
Mundesh me e lexu edhe…
Raporti thekson se indeksi i çmimeve të drithërave ra me 2.6 për qind në mars, ndërsa çmimet e grurit u ulën për shkak të lehtësimit të shqetësimeve për kushtet e të korrave në eksportuesit kryesorë të hemisferës veriore. Po ashtu, çmimet botërore të misrit, melekuqes dhe elbit shënuan ulje. Indeksi i çmimeve të orizit të FAO-së ra me 1.7 për qind, për shkak të kërkesës së dobët për importe dhe furnizimeve të bollshme të eksportueshme.
Në anën tjetër, indeksi i çmimeve të vajit vegjetal u rrit me 3.7 për qind, duke arritur një nivel 23.9 për qind më të lartë krahasuar me vitin e kaluar. Rritja u nxit nga kërkesa e fortë globale për vajrat e palmës, sojës, rapes dhe lulediellit.
Indeksi i çmimeve të mishit u rrit me 0.9 për qind në mars dhe 2.7 për qind në krahasim me një vit më parë, kryesisht për shkak të rritjes së çmimeve të mishit të derrit në Evropë. Çmimet e qumështit mbetën të pandryshuara, me një rritje të çmimeve të gjalpit dhe pluhurat e qumështit që kompensuan çmimet më të ulëta të djathit.
Po ashtu, indeksi i çmimeve të sheqerit ra me 1.6 për qind, kryesisht për shkak të kërkesës më të dobët globale.
Ky raport i FAO-së pasqyron një panoramë të ndryshueshme të tregut ushqimor global, me faktorë të ndryshëm që ndihmojnë në përcaktimin e tendencave të çmimeve dhe ndikojnë në sigurinë ushqimore botërore./Katror.info
Përgatiti:
