Me funksionalizimin e shërbimit për Fertilizim të Asistuar Mjekësor në Qendrën Klinike Universitare të Kosovës (QKUK), interesimi për këtë metodë mjekësore ka qenë shumë i lartë. Që nga përurimi i këtij shërbimi në fund të vitit të kaluar e deri më sot, janë kryer 255 konsultime, ndërsa në listën e pritjes janë edhe 470 pacientë, shkruan Katror.info
Shefi i repartit të Infertilitetit në Klinikën e Gjinekologjisë dhe Obstetrikës, Leandrit Bejtullahu, ka bërë të ditur se koha e pritjes për konsultime është nga 5 deri në 7 ditë.
“Interesimi ka qenë shumë i madh, ashtu siç e kemi pritur. Fillimisht jemi në fazën e seleksionimit të pacientëve për të përcaktuar nëse janë të përshtatshëm për metodën e fertilizimit in vitro (IVF). Deri tani janë realizuar 255 konsultime, ndërsa 470 pacientë janë në listë me termine të caktuara. Koha e pritjes është 5 deri në 7 ditë, që konsiderohet e shkurtër”, ka thënë ai për Kosova Press.
Mundesh me e lexu edhe…
Kriteret dhe kufizimet e moshës për IVF
Sipas Bejtullahut, me qelizat vetanake, gratë mund t’i nënshtrohen procesit të IVF-të deri në moshën 42-vjeçare. Për pacientet nga mosha 42 deri në 45 vjeç, trajtimi do të bëhet në bazë të vlerësimit të një komisioni të shkallës së dytë.
“Për momentin nuk kemi mundësi të punojmë me qeliza donatorësh, prandaj mosha e pacienteve është e kufizuar. Për gratë deri në 42 vjeç procedura është standarde, ndërsa për ato nga 42 deri në 45 vjeç do të bëhet një vlerësim individual përmes komisionit të shkallës së dytë. Kufizimi i moshës nuk është diskriminim, por një masë që synon suksesin më të lartë të procedurës”, ka shtuar Bejtullahu.
Suksesi i IVF dhe efektet e moshës
Duke folur për suksesin e kësaj metode, Bejtullahu ka theksuar se me kalimin e moshës, përqindja e suksesit bie dukshëm.
“Suksesi i IVF matet kur pacientja mbetet shtatzënë, e mban fëmijën deri në fund dhe lind foshnjën e gjallë. Tek gratë deri në moshën 35 vjeçare, shkalla e suksesit është 44%. Pas moshës 40 vjeçare, kjo përqindje bie në rreth 5%. Prandaj, për gratë mbi 44-45 vjeç, përdorimi i qelizave vetanake nuk është i arsyeshëm, pasi suksesi bie në nivele shumë të ulëta”, ka sqaruar ai.
Shërbimi falas për dy ciklet e para
Shefi i repartit të IVF ka bërë të ditur se dy ciklet e para të fertilizimit të asistuar do të ofrohen falas për pacientët, ndërsa në rastin e një cikli të tretë, kostoja do të jetë mbi 600 euro.
Ky shërbim u përurua më 24 dhjetor të vitit 2024, ndërsa në tetor të vitit të kaluar, ministri i Shëndetësisë, Arben Vitia, kishte njoftuar se barnat e nevojshme për këtë procedurë janë përfshirë në Listën e barnave esenciale./Katror.info
Përgatiti:
