Qeveria e Japonisë ka njoftuar se numri i personave mbi 100 vjeç ka arritur rekord të ri, duke arritur në 99,763 individë deri në shtator, sipas Ministrisë së Shëndetësisë. Ky është rekordi i 55-të radhazi për këtë statistikë. Nga ky total, 88 për qind janë gra.
Japonia ka jetëgjatësinë më të gjatë në botë dhe njihet si vendi ku jeton shpesh personi më i vjetër në botë – megjithëse disa studime e kontestojnë numrin real të njëqindvjeçarëve në të gjithë botën.
Është gjithashtu një nga shoqëritë që plaket më shpejt, me banorë që shpesh kanë dietë më të shëndetshme, por shkallë të ulët lindjeje.
Mundesh me e lexu edhe…
Personi më i moshuar në Japoni është Shigeko Kagawa, një grua 114-vjeçare nga Yamatokoriyama, pranë qytetit Nara, ndërsa burri më i moshuar është Kiyotaka Mizuno, 111 vjeç, nga qyteti bregdetar Iwata.
Ministri i Shëndetësisë, Takamaro Fukoka, përgëzoi 87,784 gra dhe 11,979 burra njëqindvjeçarë për jetëgjatësinë e tyre dhe shprehu “mirënjohjen për shumë vite kontributi në zhvillimin e shoqërisë”.
Këto të dhëna u publikuan përpara Ditës Kombëtare të Personave të Moshuar, më 15 shtator, kur njëqindvjeçarët e rinj marrin një përgëzuese dhe një kupë argjendi nga kryeministri.
Në vitet 1960, Japonia kishte proporcionin më të ulët të personave mbi 100 vjeç ndër vendet e G7, por kjo ka ndryshuar dukshëm me kalimin e dekadave. Kur qeveria filloi sondazhin për njëqindvjeçarët më 1963, kishte vetëm 153 persona mbi 100 vjeç. /Koha/Katror.info
