Joga është një praktikë që po tërheq gjithnjë e më shumë vëmendje në botën moderne – dhe jo pa arsye.
Me përfitimet e saj të shumta për trupin dhe mendjen, joga ofron një qasje gjithëpërfshirëse për shëndetin. Praktikuesit e saj raportojnë përmirësime në fleksibilitet, forcë, si dhe lehtësim nga stresi dhe ankthi.
Origjina e jogës
Mundesh me e lexu edhe…
Fjala “joga” rrjedh nga gjuha sanskrite dhe vjen nga fjala yuj, që do të thotë “të lidhësh” ose “të bashkohesh”.
Joga ka lindur në Indi dhe fillimisht është përdorur për rritje shpirtërore dhe për forcimin e lidhjes mes trupit dhe mendjes.
Megjithëse kërkimet shkencore mbi përfitimet e saj janë ende në faza të hershme, studimet e deritanishme mbështesin atë që praktikuesit kanë ditur për shekuj me radhë: joga ka një ndikim të jashtëzakonshëm në mirëqenien e përgjithshme.
Përfitimet e jogës për shëndetin janë të shumta. Disa prej tyre janë:
Përmirëson fleksibilitetin dhe ekuilibrin
Një nga përfitimet më të njohura të jogës është përmirësimi i fleksibilitetit dhe ekuilibrit. Me kalimin e viteve, fleksibiliteti mund të zvogëlohet, por joga mund ta ngadalësojë këtë proces dhe madje të përmirësojë lëvizshmërinë, veçanërisht te të moshuarit pas moshës 65-vjeçare.
Lehtëson stresin
Shumë njerëz ndjejnë ndikimin e stresit të zgjatur në jetën e përditshme. Praktika e rregullt e jogës ndihmon në menaxhimin e stresit dhe përmirëson cilësinë e jetës. Meditimi dhe frymëmarrja e thellë, përveç ushtrimeve fizike, janë elemente që kontribuojnë në uljen e tensioneve dhe qetësimin e mendjes.
Ndihmon në forcimin e trupit
Pavarësisht se shpesh lidhet me fleksibilitetin, disa lloje të jogës janë po ashtu efektive për forcimin e muskujve. Ushtrimet e bazuara në joga ndihmojnë në zhvillimin e forcës trupore, duke ofruar një qasje të plotë për përmirësimin e fizikut.
Redukton ankthin
Joga ka treguar efektivitet në trajtimin e çrregullimeve të ankthit. Studimet kanë sugjeruar se praktika e saj, veçanërisht joga nidra (meditim me skanim të trupit), mund të ulë simptomat e ankthit dhe të ndihmojë individët të menaxhojnë më mirë emocionet e tyre.
Përmirëson imunitetin
Një tjetër përfitim i jogës është përmirësimi i funksionit të sistemit imunitar. Duke reduktuar inflamacionin dhe duke rritur ndërgjegjësimin trupor, joga ka potencialin të forcojë sistemin imunitar dhe të kontribuojë në shëndetin afatgjatë.
Përmirëson cilësinë e gjumit
Pagjumësia është një nga problemet më të zakonshme të shkaktuara nga stresi. Praktika e jogës ka treguar se mund të ndihmojë në përmirësimin e cilësisë së gjumit, duke u mundësuar individëve të flenë më shpejt dhe të qëndrojnë të fjetur më gjatë.
Ndihmon në përmirësimin e vetëvlerësimit
Joga ka treguar ndikim pozitiv në vetëvlerësimin dhe imazhin trupor, veçanërisht te adoleshentët dhe të rinjtë. Kjo është një ndihmesë e rëndësishme për ata që përballen me sfida të lidhura me depresionin dhe ankthin.
Përmirëson qëndrimin trupor
Në një botë gjithnjë e më të varur nga teknologjia dhe pozitat e ulura, joga mund të ndihmojë në përmirësimin e qëndrimit dhe posturës trupore. Ajo ndikon në funksionimin e trurit që kontrollon ndërgjegjësimin trupor dhe ndihmon në mbajtjen e një qëndrimi të drejtë./Katror.info
Përgatiti:
