Koha e ditës kur pini një filxhan kafe mund të ulë rrezikun e një vdekjeje të hershme, sugjeron një kërkim i fundit.
Sipas studimit, njerëzit që pinin kafe në mëngjes kishin një rrezik më të ulët për të vdekur nga sëmundjet kardiovaskulare dhe një rrezik më të ulët të vdekshmërisë sesa ata që konsumonin kafe gjatë gjithë ditës. Megjithatë, kërkimi nuk mundi të provojë nëse kafeja ishte shkaku i vetëm.
Dr. Lu Qi, drejtuesi i kërkimit dhe drejtori i ‘Qendrës për Kërkime mbi Obezitetin në Universitetin Tulane’, tha se ndërsa studimi nuk tregon pse pirja e kafesë në mëngjes ul rrezikun, një shpjegim mund të jetë se konsumimi më vonë gjatë ditës mund të prishë ritmin biologjik të brendshëm të trupit të njeriut.
Mundesh me e lexu edhe…
Studimi u publikua të mërkurën në European Heart Journal.
Dr.Lu Qi shtoi se nevojiten studime të tjera për të parë nëse gjetjet e tyre mund të konfirmohen edhe në popullata të tjera.
“Na nevojiten prova klinike për të testuar ndikimin e mundshëm të ndryshimit të kohës së konsumit të kafesë” tha ai.
“Ky studim nuk na tregon pse pirja e kafesë në mëngjes ul rrezikun e vdekjes nga sëmundjet kardiovaskulare,” shpjegoi ai.
“Një shpjegim i mundshëm është se konsumimi i kafesë pasdite ose në mbrëmje mund të prishë ritmet cirkadiane [cikli 24-orësh i ndryshimeve fizike, mendore dhe të sjelljes] dhe nivelet e hormoneve si melatonina.
“Kjo, nga ana tjetër, çon në ndryshime të faktorëve të rrezikut kardiovaskular, si inflamacioni dhe presioni i gjakut.” shtoi ai,
Studiuesit nga Universiteti Tulane në New Orleans analizuan të dhënat e 40,725 të rriturve që kishin marrë pjesë në Anketën Kombëtare të Shëndetit dhe Ushqimit në SHBA midis viteve 1999 dhe 2018.
Ata u pyetën për konsumimin e tyre të përditshëm të ushqimit dhe pijeve, nëse pinin kafe, sa dhe kur.
“Meqenëse kafeina ka efekte në trupin tonë, donim të shihnim nëse koha e konsumimit të kafesë ndikon në shëndetin e zemrës,” shpjegoi Dr. Qi.
Ndërsa kërkimet e mëparshme kanë gjetur se konsumimi i moderuar i kafesë mund të ketë përfitime shëndetësore, ky ishte “studimi i parë që testonte modelet e kohës së konsumit të kafesë dhe rezultatet shëndetësore,” shtoi ai.
Sipas studimit, 36% e pjesëmarrësve pinin kafe në mëngjes, ndërsa 14% konsumonin kafe gjatë gjithë ditës.
Dr. Qi dhe ekipi i tij i ndoqën pjesëmarrësit për pothuajse një dekadë, duke analizuar regjistrimet e tyre dhe shkaqet e vdekjes gjatë kësaj periudhe.
Gjatë ndjekjes prej gati 10 vitesh, 4,295 persona vdiqën, përfshirë 1,268 vdekje të lidhura me sëmundje kardiovaskulare.
Studiuesit gjetën se ata që pinin kafe në mëngjes kishin 16% më pak gjasa të vdisnin krahasuar me ata që nuk pinin kafe dhe 31% më pak gjasa të vdisnin nga sëmundjet e zemrës.
Gjithashtu, ata panë se konsumuesit e kafesë gjatë gjithë ditës nuk kishin ulje të rrezikut krahasuar me ata që nuk pinin fare kafe.
“Pirja e kafesë në mëngjes mund të ketë një lidhje më të fortë me një rrezik më të ulët të vdekshmërisë sesa pirja e kafesë më vonë gjatë ditës,” shkruajnë ata në dokumentin e kërkimit.
Studiuesit zbuluan gjithashtu se sasi më të larta të konsumit të kafesë ishin ‘në mënyrë të ndjeshme’ të lidhura me një rrezik më të ulët të vdekshmërisë, por vetëm midis atyre që pinin kafe në mëngjes krahasuar me ata që konsumonin gjatë gjithë ditës.
Në një editorial shoqërues, Prof. Thomas F. Luscher nga spitalet Royal Brompton dhe Harefield në Londër pyeti: ‘Pse do të kishte rëndësi koha e ditës?’
“Paradite, zakonisht ka një rritje të dukshme të aktivitetit simpatik [aktivitet që vë sistemet trupore në gatishmëri] ndërsa zgjohemi dhe ngrihemi nga shtrati, një efekt që zhduket gjatë ditës dhe arrin nivelin më të ulët gjatë gjumit” thuhet tutje.
Prof. Luscher tha se siç sugjerojnë studiuesit është ‘e mundur’ që konsumimi i kafesë më vonë gjatë ditës të prishë orën e brendshme të trupit në një kohë kur duhet të pushojmë.
“Shumë nga ata që konsumojnë kafe gjatë gjithë ditës vuajnë nga çrregullimet e gjumit,” shpjegoi ai, duke shtuar se ‘në këtë kontekst, është interesante që kafeja duket se shtyp melatoninën, një ndërmjetës i rëndësishëm që shkakton gjumë në tru”.
Studimi gjithashtu tregoi se konsumuesit e kafesë në mëngjes kishin më shumë gjasa të konsumonin çaj dhe pije të gazuara me kafeinë, ndërsa konsumonin më pak kafe, qoftë të zakonshme apo pa kafeinë, krahasuar me ata që pinin kafe gjatë gjithë ditës. /Katror.info
Përgatiti:
