Zyra e Rregullatorit për Energji (ZRRE) ftoi sot përfaqësues të mediave në një takim për të diskutuar rreth propozimit për shtrenjtimin e çmimit të energjisë elektrike në Kosovë. Takimi, i cili ishte paraparë të niste në ora 10:00, filloi me më shumë se 30 minuta vonesë dhe u shoqërua me përplasje për transparencë, shkruan Katror.info.
ZRRE kërkoi që takimi të zhvillohej pa praninë e kamerave, kërkesë kjo që u kundërshtua nga gazetarët e pranishëm. Si pasojë e refuzimit të tyre për të marrë pjesë në diskutime pa xhirime u vlerësua nga Asociacioni i Gazetarëve të Kosovës (AGK) si mungesë e transparencës dhe llogaridhënies nga institucionet publike.
“AGK-ja dënon mungesën e transparencës nga ZRRE-ja dhe mirëpret organizimin dhe reagimin e gazetarëve të mediave të Kosovës për të kërkuar transparencë nga Zyra e Rregullatorit për Energji”, thuhet në reagimin e këtij asociacioni.
Mundesh me e lexu edhe…
Pas insistimit të gazetarëve dhe disa diskutimeve, drejtori menaxhues i ZRRE-së, Petrit Pepaj, konfirmoi se takimi do të vazhdojë me praninë e kamerave. Megjithatë, anëtarët e bordit të ZRRE-së, që ishte planifikuar të flisnin gjatë këtij takimi, nuk u paraqitën më pas.
“ZRRE nuk ka qëllim të fshehë asgjë. Roli i mediave është i rëndësishëm, veçanërisht kur bëhet fjalë për një sektor kaq të ndjeshëm. Angazhimi ynë me mediat është i pandërprerë”, deklaroi Pepaj.
Ky zhvillim vjen vetëm dy ditë pas protestës qytetare të organizuar nga iniciativa “Asnjë cent ma shumë”, e mbajtur më 5 prill në Prishtinë. Protestuesit kërkuan anulimin e propozimit për shtrenjtimin e rrymës, duke mbajtur pankarta me mesazhe si “Ndal varfërimit të qytetarëve!”, “S’ka dritë me padrejtësi” dhe “Qeveri, a je me qytetarët apo me monopolin?”.
Propozimi për shtrenjtim prej 15% i energjisë elektrike, i publikuar nga ZRRE më 14 mars 2025, është bazuar në raportet e dorëzuara nga KOSTT, KEDS dhe KESCO për të hyrat maksimale të lejuara. Ky propozim është kundërshtuar nga partitë opozitare si LDK, AAK dhe PDK, por edhe nga Presidenca e Kosovës, e cila më 28 mars deklaroi se rritja e propozuar bie ndesh me kornizën ligjore dhe injoron gjendjen ekonomike të qytetarëve.
Nga ana tjetër, Ministria e Ekonomisë ka propozuar që çdo rritje e mundshme të mos prekë amvisëritë që konsumojnë më pak se 800 kWh në muaj.
Përderisa vendi pret një vendim përfundimtar nga ZRRE, kërkesa për transparencë mbetet kyçe – si për gazetarët, ashtu edhe për qytetarët që do të preken drejtpërdrejt nga çdo ndryshim në çmimin e energjisë./Katror.info
Përgatiti:
