Me një ceremoni zyrtare, KFOR-i italian ka dorëzuar sot një donacion në vlerë prej afërsisht 10 mijë eurosh për Shërbimin e Zjarrfikësve në Kaçanik. Ky donacion përmban pajisje të rëndësishme për zjarrfikësit, disa prej të cilave po përdoren për herë të parë në këtë komunë.
Udhëheqësi i Shërbimit Zjarrfikës, Ylber Shehu, falënderoi KFOR-in italian për ndihmën e dhënë, duke theksuar nevojën për ripërtëritjen e pajisjeve të amortizuara dhe rëndësinë e pajisjeve të reja për përmirësimin e shërbimit ndaj komunitetit.
Kryetari i Komunës së Kaçanikut, Besim Ilazi, shprehu mirënjohje për KFOR-in italian, duke rikujtuar mbështetjen e vazhdueshme që prej vitit 1999 në fusha si siguria, arsimi dhe shëndetësia. Ai theksoi se ky donacion për zjarrfikësit është një tjetër shembull i bashkëpunimit të frytshëm mes KFOR-it dhe komunës.
Mundesh me e lexu edhe…
Komandanti i KFOR-it italian, i cili nënshkroi dorëzimin e donacionit së bashku me drejtorin e Shërbimeve Publike dhe Emergjencave, Ramadush Osmani, vlerësoi bashkëpunimin korrekt me komunën e Kaçanikut. Ai tha se KFOR-i italian i kushton rëndësi të veçantë mbështetjes së komunave që janë më larg bazës ushtarake në Pejë.
Në ceremoni morën pjesë edhe Nënkryetari i Komunës, Sabedin Vishi, përfaqësues nga KFOR-i italian, polak dhe amerikan. Pas përfundimit të aktivitetit, pjesëmarrësit vizituan objektin e ri të Shërbimit të Zjarrfikësve, që është në ndërtim e sipër, një investim i komunës së Kaçanikut.
Ky donacion pritet të ndihmojë ndjeshëm në përmirësimin e efikasitetit të Shërbimit të Zjarrfikësve dhe sigurisë së komunitetit në Kaçanik./Katror.info
Përgatiti:
