Një hap i rëndësishëm për mbështetjen e arsimit dhe zhvillimin e brezave të rinj është realizuar sot nga Fondacioni Golden Eagle, në bashkëpunim me kompaninë Frutex, duke shpërndarë edhe 35 bursa për studentët pasi muajin e kaluar ishin shpërndarë gjithashtu 35 bursa të tjera për vitin akademik 2024/2025.
Vlera e bursës për secilin student është 800 euro dhe ky projekt është pjesë e angazhimit të vazhdueshëm të Fondacionit Golden Eagle për të ndihmuar studentët e talentuar.
Drejtori i Frutex, Shaqir Palushi, i cili është një nga nismëtarët kryesorë të këtij projekti, theksoi rëndësinë e arsimit dhe mbështetjes për studentët.
“Fondacioni Golden Eagle do të ndajë 35 bursa, duke iu përzgjedhur juve në mesin e rreth një mijë studentëve që kanë aplikuar deri më tani. Këto bursa nuk janë vetëm një mbështetje financiare për ju, por edhe një mbështetje për rrugën që keni zgjedhur drejt suksesit. Pa dyshim se ju do të bëheni liderë dhe arkitektë të së ardhmes dhe do të jeni model për gjeneratat e reja se si duhet dhe mund të ndihmohet dhe ndërtohet atdheu”, ka thënë Palushi.
Për studentët që përfitojnë nga këto bursa, kjo është një mundësi e jashtëzakonshme që ndihmon për të realizuar ambiciet e tyre.
Arson Racaj, student i fakultetit Teknik nga Klina, u shpreh se ai nuk e priste fitimin e bursës, por e konsideron atë si një mundësi të shkëlqyer.
“Me të thënë të drejtën, nuk e kam pritë fitimin e kësaj burse, po megjithatë më duket nga Fondacioni Golden Eagle një veprim i mirë, pasi i jep përkrahje studentëve që kanë mesatare të lartë. U gëzova shumë dhe besoj që do të më ndihmojë shumë”, ka thënë ai.
Një tjetër studente, Vesa Gashi nga fshati Leshan i Komunës së Suharekës, tha se ndihma është shumë e rëndësishme për studentët që përballen me sfida të ndryshme gjatë studimeve.
“Ne si studentë gjithmonë hasim në sfida të ndryshme dhe familjet që kanë më shumë se një fëmijë në shkollë, padyshim kanë nevojë për ndihmë dhe mbështetje”, tha Vesa.
Edhe Agnesa Daka, studente në Fakultetin Ekonomik nga Suhareka, falënderoi Fondacionin Golden Eagle për mundësinë e ofruar.
“Jam shumë mirënjohëse për mundësinë që më është dhënë dhe për ndihmën e madhe financiare. Ky është edhe një inkurajim për mua që të vazhdoj përpjekjet e mia dhe një ditë, kur të kem mundësinë, të ndihmoj dikë tjetër, ashtu siç na kanë ndihmuar edhe ne”, tha Agnesa./Katror.info
Përgatiti:
