Kosova, 17 vjet shtet!

Sot mbushen 17 vjet, që kur më 17 shkurt 2008, deputetet e Kuvendit të Kosovës e nënshkruan Deklaratën e Pavarësisë, duke e bërë Kosovën shtetin më të ri në Evropë.

Një parakalim i Forcës së Sigurisë së Kosovës e Policisë së Kosovës, ceremoni te monumentet e heronjve kombëtarë, koncerte e pritje shtetërore janë disa nga ngjarjet e përvjetorit të planifikuara për sot në kryeqytet, Prishtinë.

Kosova, shteti më i ri i Evropës shpalli pavarësinë nga Serbia më 17 shkurt 2008, gati nëntë vjet pas një fushate bombardimesh 78-ditore nga NATO në vitin 1999, e cila i dha fund shtypjes së përgjakshme të shqiptarëve nga Beogradi. Gjykata Ndërkombëtare e Drejtësisë vendosi në vitin 2010 se kjo shpallje nuk shkeli ligjin ndërkombëtar.

Shtetet e Bashkuara dhe shumica e fuqive perëndimore janë ndër 117 vendet që kanë njohur shtetësinë e Kosovës, dhe rreth 200 organizata ndërkombëtare e kanë pranuar anëtarësimin e saj, megjithëse jo Kombet e Bashkuara. Disa vende evropiane, përfshirë Bosnjën, Qipron, Greqinë, Moldavinë, Rumaninë, Spanjën, Sllovakinë dhe Ukrainën, nuk e njohin Republikën e Kosovës.

Që nga shpallja e pavarësisë më 17 shkurt 2008, Kosova ka bërë hapa të rëndësishëm në integrimin ndërkombëtar duke u anëtarësuar në organizata të ndryshme ekonomike, politike dhe sportive. Nga 1 janari 2024, qytetarët e Kosovës mund të udhëtojnë pa viza në Zonën Shengen, një arritje historike që shënon integrimin e mëtejshëm të vendit në Evropë dhe lëvizjen e lirë për qytetarët e tij.

Ndërsa Bashkimi Evropian ka ndërmjetësuar negociatat midis Serbisë dhe Kosovës që nga viti 2011, pak nga mbi 30 marrëveshjet e nënshkruara janë zbatuar. Si BE-ja ashtu edhe Shtetet e Bashkuara kanë bërë presion për një pajtim më të shpejtë dhe arritjen e marrëveshjes së normalizimit.

17 vjetori i pavarësisë, ngritet solemnisht flamuri i Kosovës

Presidentja Vjosa Osmani si dhe kryeministri Albin Kurti kanë marrë pjesë në ceremoninë e ngritjes solemne të flamurit të Kosovës, me rastin e shënimit të 17-vjetorit të Pavarësisë së Kosovës.

Të pranishëm në këtë ceremoni, ishin edhe përfaqësues tjerë të shtetit.

Ushtria e Policia e Kosovës parakalojnë për 17-vjetorin e Pavarësisë

Kosova feston 17 Shkurtin, Ditën e Pavarësisë, me një nga ngjarjet më të rëndësishme shtetërore – parakalimin ceremonial.

Kjo paradë ushtarake dhe institucionale është një moment solemn dhe madhështor, ku Forca e Sigurisë së Kosovës (FSK), Policia e Kosovës dhe njësitë e tjera shtetërore marshojnë në nder të pavarësisë dhe sakrificave për lirinë e vendit.

Liderët botërorë urojnë Kosovën në 17-vjetorin e Pavarësisë së Kosovës

Me rastin e 17-vjetorit të Pavarësisë së Kosovës, Presidenti i Republikës së Francës, Emmanuel Macron, ka uruar  Presidenten e Republikës së Kosovës, Vjosa Osmani Sadriu, duke rikonfirmuar mbështetjen e Francës për pavarësinë dhe integrimin evropian të Kosovës.

“Përballë çrregullimeve dhe fragmentimit të botës, perspektiva evropiane e Kosovës, si e të gjitha vendeve të Ballkanit Perëndimor, duhet të rikonfirmohet. Ju siguroj për përkrahjen e Francës për të mbështetur vendin tuaj në këtë rrugë”, thuhet në urimin e Presidentit Macron. Më tej, në urim shfaqi shpresën që të dy shtetet të mund të vazhdojnë të bashkëpunojnë, veçanërisht lidhur me organizimin e Lojërave Mesdhetare në vitin 2030 në Kosovë.

“Franca është e gatshme t’ju ndihmojë që kjo ngjarje madhore të ketë një sukses të plotë”, thuhet në urim.

ë këtë urim, Presidenti Macron ka falënderuar Presidenten Osmani për pjesëmarrjen në ceremoninë e rihapjes së Katedrales Notre-Dame.

“Franca mbetet një aleate e përkushtuar e Kosovës dhe do të vazhdojë ta mbështesë stabilitetin, zhvillimin dhe perspektivën evropiane të saj”, ka shkruar ndër të tjera në urimin e tij, Presidenti Macron.

Presidentja e Republikës së Kosovës, Vjosa Osmani  ka pranuar një urim për 17 vjetorin e Pavarësisë së Kosovës edhe nga Presidenti i Republikës Federale të Gjermanisë, Frank-Walter Steinmeier.

Në urim, Presidenti Steinmeier ka riafirmuar mbështetjen e Gjermanisë për pavarësinë dhe rrugën evropiane të Kosovës, duke rikujtuar se shteti i tij në shkurt 2008, ishte ndër vendet e para që njohu shtetin e Kosovës.

“Gjatë këtyre viteve, kemi thelluar vazhdimisht bashkëpunimin tonë, qoftë në politikat e sigurisë, në reformat për përafrimin me BE-në apo në fushën e politikave të klimës dhe energjisë”, thuhet në urimin e Presidentit Steinmeier.

Më tej, Steinmeier ka potencuar se në çështjet e politikës së jashtme, Kosova është pozicionuar qartësisht në përputhje me politikën e jashtme dhe të sigurisë së Bashkimit Evropian, veçanërisht në mbështetjen e Ukrainës kundër agresionit të Rusisë, në shkelje të të drejtës ndërkombëtare.

“Gjermania mbështet në mënyrë të pandryshuar njohjen ndërkombëtare të Kosovës dhe dëshiron që ajo të bëhet anëtare e Bashkimit Evropian..”, thuhet në urim.

Në fund të urimit të tij, Presidenti Steinmeier ka theksuar se Gjermania mbetet një mbështetëse e fuqishme e Kosovës, duke përkrahur stabilitetin, zhvillimin dhe integrimin evropian.

Me rastin e 17-vjetorit të Pavarësisë së Kosovës, Presidenti i Republikës së Italisë, Sergio Mattarella, i ka dërguar një mesazh urimi Presidentes së Republikës së Kosovës, Vjosa Osmani Sadriu, duke shprehur përkushtimin e Italisë për marrëdhëniet ndërmjet dy vendeve dhe mbështetjen për stabilitetin dhe integrimin evropian të Kosovës.

Në mesazhin e tij, Presidenti Mattarella ka theksuar se të dy shtetet kanë fuqizuar miqësinë vazhdimisht  gjatë viteve, falë edhe kontributit të palëkundur të Italisë për stabilitetin dhe sigurinë e Kosovës.

“Republika e Italisë mbetet një partner i përkushtuar i Kosovës, duke mbështetur përparimin e saj drejt integrimit euroatlantik dhe fuqizimin e demokracisë dhe stabilitetit në rajon”, thuhet në urimin e Presidentit Mattarella.

Presidentja Osmani dekoron familjen Jashari me rastin e 17-vjetorit të Pavarësisë

Në kuadër të festimeve të 17-vjetorit të Pavarësisë së Republikës së Kosovës, Presidentja Vjosa Osmani ka organizuar një ceremoni solemne ku ndau Dekorata Presidenciale. Gjatë kësaj ceremonie, ajo ka nderuar familjen Jashari, duke i njohur sakrificën e jashtëzakonshme të çdo anëtari të saj që qëndroi dhe luftoi për lirinë e Kosovës, shkruan Katror.info.

Presidentja Osmani theksoi se ky 17-vjetor është një moment i shenjët për të nderuar historinë dhe sakrificën e kombit shqiptar, duke e bërë bashkë këtë moment të lavdishëm në një akt solemniteti. Ajo po ashtu theksoi se dekorimi është një akt që i njeh ata që e bënë Kosovën të lirë dhe të gjithë ata që vazhdojnë të kontribuojnë për të ardhmen e vendit.

“Në këtë ditë të shenjtë, në këtë moment solemn, ne nuk po përkujtojmë vetëm një datë – ne po nderojmë një epokë të lavdishme! 17 vjet liri, 17 vjet shtet, 17 vjet betejë për t’i treguar botës se Kosova është e përjetshme”, tha Presidentja Osmani.

Urimet e qytetarëve në 17 Vjetorin e Pavarësisë së Kosovës

Ndonëse moti është i ftohtë, rrugët e Prishtinës janë të mbushura me qytetarë, të cilët, me zemrën plotë dolën për të kremtuar këtë ditë të madhe për Kosovën.

Që nga mëngjesi, është vërejtur një fluks i madh i qytetarëve, të cilët, dolën për të festuar të drejtat dhe liritë që kanë fituar me shpalljen e pavarësisë.

Sheshi i kryeqytetit është plot me njerëz, të cilët janë të mbushur me emocione, krenari, dëshira e ëndërra për Kosovën.

Një numër i konsideruar qytetarësh, si nga Kosova ashtu edhe nga diaspora, kanë qenë të interesuar për të parë pamjen e re që ka marrë monumenti ‘NEWBORN’, i cili është transformuar dhe ka marrë një pamje të re me tematikën e inteligjencës artificiale.

Ky monument, simbol i pavarësisë së Kosovës, ka tërhequr shumë sy të entuziazmuar. Ish deputeti i Kuvendit të Kosovës, akademiku Sabri Hamiti uroi qytetarët e Kosovës dhe e vlerësoi këtë ditë si ditën më të madhe në historinë e Kosovës.

Po ashtu, një tjetër mesazh i rëndësishëm erdhi nga Hana Berisha, e cila theksoi rëndësinë e bashkimit dhe angazhimit të rinisë për të kontribuar në të ardhmen e Kosovës. Ajo shprehu besimin e thellë se Kosova do të bëhet gjithnjë e më e fortë dhe më e zhvilluar, duke apeluar për një angazhim të përbashkët për një të ardhme më të mirë.

Hana Berisha bëri apel tek të rinjtë e Kosovës që të angazhohen për një të ardhme më të mirë dhe më të zhvilluar për vendin e tyre. Ajo i ftoi ata të besojnë në potencialin e Kosovës dhe të kontribuojnë me punë dhe përkushtim për të ndihmuar që vendi të rritet dhe të bëhet edhe më i fortë.

Po ashtu, urime erdhën edhe nga qytetarët, që kishin ardhur nga diaspora me dëshirën më të madhe për të festuar këtë ditë të shënuar.

Ata uruan për këtë ditë të veçantë dhe shprehën krenarinë e tyre për arritjet e Kosovës si një shtet i pavarur, duke e parë atë si një shembull të forcës dhe unitetit të popullit kosovar.

Urimet nuk munguan as nga ana e fëmijëve, të cilët me fytyra të buzëqeshura dhe zemra plot, ishin veshur me ngjyrat e Kosovës dhe uruan për këtë ditë të madhe.

Ata, me pasion dhe gëzim, shprehën krenarinë për atdheun e tyre dhe i dhanë një ngjyrë festive këtij momenti historik. /Katror.info