Platforma “Kosova.Film”, e lansuar nga Qendra Kinematografike e Kosovës, synon të bashkojë në një vend të vetëm talentet, burimet dhe vendxhirimet e mundshme, duke ofruar informacion të vlefshëm për të gjithë profesionistët e filmit.
Qëllimi i kësaj platforme është lidhja mes artistëve të vendit dhe produksioneve ndërkombëtare duke e paraqitur Kosovën si një destinacion tërheqës për projektet filmike.
Asistentja e Qendrës Kinematografike e Kosovës (QKK), Arbnore Hyseni, në një bisedë për Albanian Post tregon se kjo platformë do të duhet të shndërrohej në një hapësirë të dedikuar për prezantimin e artistëve, regjisorëve, aktorëve, skenaristëve dhe të gjithë profesionistëve të artit.
Mundesh me e lexu edhe…
“Faqja mundëson krijimin e kontakteve globale për ata që duan të bashkëpunojnë me artistë nga Kosova. Përdoruesit nga e gjithë bota mund të hyjnë në kategori specifike për të gjetur profesionistët që u duhen dhe të vendosin komunikim të drejtpërdrejtë pa barriera”, thotë Hyseni për Albanian Post.
Ajo tregon se kjo platformë kishte ekzistuar edhe në të kaluarën.
“Më herët, platforma ekzistonte, por përdorej vetëm për lokacione filmike, pastaj lindi ideja nga drejtoresha e QKK-së Blerta Zeqiri, që kjo platformë të shndërrohej në një hapësirë të dedikuar për prezantimin e artistëve, regjisorëve, aktorëve, skenaristëve dhe të gjithë profesionistëve të artit në Kosovë”.
Sipas saj, kjo platformë përfaqëson një hap të madh drejt digjitalizimit dhe modernizimit të industrisë së filmit në tregun global.
“Ajo synon të hapë rrugë të reja për artistët, regjisorët dhe skenaristët kosovarë, duke i ndihmuar ata të krijojnë kontakte dhe bashkëpunime ndërkombëtare”.
Përveç këtyre kjo platformë dallohet edhe me një aspekt tjetër.
“Një nga veçoritë kryesore të platformës është mundësia për të eksploruar një gamë të gjerë lokacionesh të përshtatshme për xhirime. Përdoruesit mund të zgjedhin ndërmjet ndërtesave të vjetra kulturore, muzeve historikë, parqeve natyrore e shumë vende të tjera”.
Platforma përfshin një katalog të gjerë të profesionistëve të fushës, duke përfshirë producentë, stilistë, drejtorë artistikë dhe shumë role të tjera kyçe në procesin e prodhimit të një filmi. Ajo është krijuar për të ndihmuar krijimin e ekipeve filmike dhe për të përmirësuar efikasitetin e punës në këtë industri.
“Kjo u ofron regjisorëve një mundësi të shkëlqyer për të gjetur aktorët e duhur për projektet e tyre dhe për të promovuar talentet vendase në tregun ndërkombëtar. Përzgjedhja e këtij emri simbolik tregon përkushtimin tonë për ruajtjen e identitetit kinematografik të Kosovës dhe për promovimin e trashëgimisë sonë kulturore”, përfundon Hyseni.
Çka ofron platforma “Kosova Film?”
Platforma “Kosova Film” ofron një mundësi të shkëlqyer për profesionistët e industrisë filmike, pasi që e njëjta synon që ta lehtësojë punën e regjisorëve dhe producentëve në gjetjen e ambienteve ideale për realizimin e projekteve filmike.
Po ashtu, përfshihen kompani të specializuara që ofrojnë shërbime të ndryshme për industrinë e filmit. Kjo kategori përfshin kompani të reklamave, fotografisë profesionale dhe dizajnit grafik, të cilat janë thelbësore për fazat e prodhimit dhe promovimit të një filmi.
Me këtë seksion, përmes faqes bashkëpunimi mes artistëve dhe bizneseve bëhet më i lehtë, për regjisorët dhe producentët, një nga kategoritë më të veçanta është baza e të dhënave me 341 aktorë të regjistruar nga vende të ndryshme.
Përmes kësaj faqeje, synohet të forcohen bashkëpunimet jo vetëm brenda Kosovës, por edhe me industrinë ndërkombëtare.
Kjo është arsyeja pse një nga qëllimet kryesore të platformës është hapja e mundësive të reja për artistët, regjisorët dhe skenaristët, duke i lidhur ata me industrinë globale të filmit.
“Kosova Film” është frymëzuar nga organizata historike me të njëjtin emër, e cila u themelua më 20 shkurt 1969 dhe ka luajtur një rol të rëndësishëm në zhvillimin e industrisë së filmit në Kosovë.
Platforma kontribuon në promovimin e veprave dhe artistëve kosovarë, duke siguruar që ata të mbeten pjesë e rëndësishme e industrisë kinematografike kombëtare dhe ndërkombëtare./Albanian Post/Katror.info
Përgatiti:
