Komunat e Kosovës kanë mundësinë të bëhen pjesë e një nisme të re rajonale që synon përmirësimin e qasjes në internet në hapësirat publike. Programi WiFi4WB (Wi-Fi për Ballkanin Perëndimor), i financuar nga Bashkimi Evropian dhe Ministria Federale Gjermane për Bashkëpunim Ekonomik dhe Zhvillim, do të ofrojë hotspote Wi-Fi falas për deri në 500 komuna në të gjithë rajonin, përfshirë Kosovën, shkruan Katror.info.
Përmes kësaj iniciative, pikat e qasjes në internet do të vendosen në sheshe, parqe, shkolla, biblioteka dhe muze, duke mundësuar një lidhje të qëndrueshme dhe të besueshme për qytetarët dhe vizitorët. Programi vjen si pjesë e EU4Digital Action dhe Planit të Rritjes së BE-së për Ballkanin Perëndimor, duke vënë në theks transformimin digjital si një motor të rëndësishëm të integrimit rajonal dhe zhvillimit të qëndrueshëm.
Komunat që përzgjidhen do të përfitojnë nga një mbështetje gjithëpërfshirëse, që përfshin furnizimin dhe instalimin e pajisjeve, mbulimin e shpenzimeve të internetit dhe mirëmbajtjen teknike. Në këmbim, ato duhet të zotohen për vazhdimin e funksionimit të shërbimit edhe pas përfundimit të financimit fillestar, duke garantuar qasje afatgjatë dhe të qëndrueshme në internet.
Mundesh me e lexu edhe…
Thirrja për aplikim është e hapur deri më 28 prill 2025 dhe u drejtohet të gjitha komunave të Kosovës, me aplikimet që duhet të dorëzohen nga kryetarët e komunave, zyrtarë të punësuar ose anëtarë të këshillave komunalë.
WiFi4WB është frymëzuar nga suksesi i WiFi4EU – programi i BE-së që ka ofruar lidhje falas me internet për afro 9,000 komuna në Evropë – dhe tani synon të zgjerojë të njëjtën mundësi edhe për qytetarët e Ballkanit Perëndimor./Katror.info
Përgatiti:
