“Të performosh në një vend të ri për mua është gjithmonë emocionues, por këtu ka një domethënie të veçantë, sepse jam në mesin e njerëzve të mi.” Me këto fjalë të ndjera, tenori me famë botërore, Saimir Pirgu, përshkroi emocionet e tij për debutimin e shumëpritur në skenën kosovare gjatë një konference për media të mbajtur më 9 dhjetor 2024 në Prishtinë.
Pirgu, i cili konsiderohet një nga emrat më të shquar të skenës operistike ndërkombëtare, do të sjellë një gala koncert të veçantë, cilësuar si një nga ngjarjet më të rëndësishme kulturore të vitit në Kosovë.
“Jemi vende që kemi vuajtur shumë dhe të pretendosh të kesh opera në një shtet të porsaformuar është të kërkosh siç themi ne qiqra në hell. Por është një ide e mirë që ka përpjekje që nga kjo qendër e vogël si Prishtina t’i japin kulturë gjithë Kosovës e Shqipërisë. Kjo është një vlerë që duhet vlerësuar”, ka thënë ai.
Gjatë konferencës, e cila u zhvillua në Pallatin e Rinisë dhe Sporteve, u prezantuan detajet e koncertit, ku morën pjesë edhe dirigjentja me përvojë ndërkombëtare Elda Laro, sopranoja kosovare Marigona Qerkezi, dhe përfaqësues të Operës së Kosovës, Meriton Ferizi dhe Rreze Kryeziu-Breznica.
Pirgu shtoi se ekzistenca e Operës së Kosovës, përkundër sfidave, është një mesazh i fuqishëm për vendin dhe identitetin kulturor të tij. Ai ka bërë të ditur se ideja për ta futur në këtë turne Kosovën vjen nga fakti se emri Opera e Kosovës brenda një turi të tillë është diçka e madhe.
“Andej nga jashtë nuk e di kush se çfarë bëhet në Kosovë, duhet të jemi realistë. Por fakti që ekziston Opera e Kosovës është një informacion shumë i fortë, sepse opera është niveli më i lartë i kulturës. Fakti që Kosova ka një institucion si Opera është më e rëndësishme se çfarë bën Opera në realitet”, ka thënë ai.
Ai ka sqaruar se në album ka përfshirë edhe arien e operës “Skëndërbeu” të Prenkë Jakovës, pasi i intereson identiteti kombëtar.
“Gjuha na ka mbajtur gjallë dhe kjo gjuhë duhet mbështetur. Kjo duhet të reflektohet. Ku mund të jap unë një kontribut të vogël? Në punën time”, ka thënë ai. Sipas Pirgut, fakti që në konferencën para koncertit qe veç një ekip mediatik tregon shumë. Ka thënë se në këtë rast ka diçka, pasi mediat mblidhen edhe për gjëra të kota.
“Ne jemi mësuar t’ju japim vlera gjërave që nuk kanë vlerë. Këto ekranet janë vetëm fasadë për të mbuluar diçka që nuk shkon. Unë dëgjohem nesër në sallën që nuk ka akustikë. Do të jem atje me ata njerëz që s’kanë instrumente të mira. Prandaj jam këtu për ato që kemi. Më bukë e me kripë”, ka thënë ai derisa ka komentuar edhe ekranin gjigant prapa me figurën e tij.
Edhe 25 vjet pas luftës, Kosova ende nuk ka një sallë koncertale, ndërsa përpjekjet për ndërtimin e Teatrit të Operës dhe Baletit, të nisura më 2009, u ndërprenë pas shpenzimit të mbi një milion eurove, dhe pavarësisht përpjekjeve të reja nga Ministria e Kulturës, as projekti fillestar ende nuk është përfunduar.
Sopranoja e njohur kosovare me nam botëror Marigona Qerkezi, që do të ndajë skenën me Pirgun, tha: “Jam e lumtur që rikthehem për publikun tim dhe të ndaj këtë skenë me një tenor të kalibrit të Saimir Pirgut, i cili është yni, por i përket botës.”
Koncerti do të drejtohet nga dirigjentja e shquar Elda Laro, e cila vlerësoi këtë bashkëpunim si një ngjarje historike për skenën operistike kosovare: “Është një privilegj të jem pjesë e një koncerti që përfaqëson jo vetëm artin, por edhe shpirtin e Kosovës.”
Meriton Ferizi dhe Rreze Kryeziu-Breznica, përfaqësues të Operës së Kosovës, theksuan rëndësinë e këtij koncerti si një hap të madh për zhvillimin e artit operistik në vend. Kryeziu-Breznica deklaroi: “Jemi të nderuar të mirëpresim një artist si Saimir Pirgu dhe të tregojmë se kultura në Kosovë ka potencial të jashtëzakonshëm.”
Koncerti pritet të sjellë arie të përzgjedhura nga albumi i Pirgut, “Saimir”, duke shënuar një moment historik për artin dhe kulturën kosovare./Katror.info
Përgatiti:
