Kombëtarja e Kosovës ka arritur një fitore të rëndësishme sot në Kaunas, duke mposhtur Lituaninë 2-1 në kuadër të Ligës së Kombeve.
Ky rezultat e afron Kosovën me kalimin e grupit, pasi ekipi tani barazon pikët me Rumaninë që kryeson grupin 2 të Ligës C.
Ndeshja filloi pozitivisht për Kosovën, me Edon Zhegrovën që zhbllokoi rezultatin në minutën e 20-të, duke shënuar një gol të bukur me stilin e tij të veçantë.
Mundesh me e lexu edhe…
Gjatë pjesës së dytë, Ermal Krasniqi, i cili sapo kishte hyrë në fushë, dyfishoi rezultatin me një gol të mrekullueshëm në minutën e 65-të pas një depërtimi të shpejtë në zonën kundërshtare.
Lituania ngushtoi rezultatin në minutën e 84-të, pas një daljeje të gabuar të portierit Amir Saipi, që i dha mundësi Golubickas të shënojë për vendasit.
Megjithatë, Dardanët arritën ta ruajnë epërsinë deri në fund, duke marrë kështu fitoren e dytë në fazën e grupeve, pas triumfit të mëparshëm ndaj Qipros me rezultat 4-0.
Fitorja e sotme e rendit Kosovën në vendin e dytë, me pikë të barabarta me Rumaninë.
Ndeshja e ardhshme për Kosovën do të zhvillohet në stadiumin “Fadil Vokrri” kundër Qipros, me 15 tetor./Katror.info
