Komisioni Qendror i Zgjedhjeve sot pritet të certifikoi rezultatin e zgjedhjeve të 9 shkurtit.
Paraprakisht KQZ u është drejtuar partive politike me një letër, duke u kujtuar atyre detyrimet ligjore që lidhen me dorëheqjen e anëtarëve të Qeverisë aktuale që zgjidhen deputetë në legjislaturën e re.
Sipas letrës që kryetari i KQZ-së, Kreshnik Radoniqi u ka dërguar partive përmendet se neni 26 i Ligjit për Qeverinë e Republikës së Kosovës parasheh se anëtarët e Qeverisë në detyrë që zgjidhen deputetë duhet të japin dorëheqje nga posti i anëtarit të Qeverisë para ditës së certifikimit të rezultatit të zgjedhjeve.
Mundesh me e lexu edhe…
Tutje thuhet se KQZ më 26 mars 2025 ka pranuar vendimet e Gjykatës Supreme të Republikës së Kosovës, të cilat kanë të bëjnë me procesin ankimor ndaj vendimeve të Panelit Zgjedhor për Ankesa dhe Parashtresa lidhur me shpalljen e rezultatit përfundimtar të zgjedhjeve.
“Komisioni Qendror i Zgjedhjeve (KQZ), më datën 26.03.2025, ka pranuar vendimet e Gjykatës Supreme të Republikës së Kosovës, që kanë të bëjnë me procesin ankimor ndaj vendimeve të Panelit Zgjedhor për Ankesa dhe Parashtresa lidhur me shpalljen e rezultatit përfundimtar të procesit zgjedhor nga ana e KQZ-së. Po ashtu kemi pranuar konfirmimet nga këto dy institucione se nuk kanë ndonjë ankesë tjetër që ka të bëjë me procesin zgjedhor që pret vendimmarrje. Andaj, në zbatim të nenit 26 paragrafi 1 të Ligjit për Qeverinë e Republikës së Kosovës (Ligji Nr.08/L.117), ju njoftojmë se certifikimi i rezultatit të Zgjedhjeve për Kuvendin e Republikës së Kosovës, të mbajtura më datën 09.02.2025, do të bëhet më datën 27.03 .2025 në ora 16:00”, thuhet në letër.
Letra e kryesuesit të KQZ-së, Kreshnik Radoniqi, i bën thirrje partive politike të respektojnë ligjin dhe të ndërmarrin veprimet e nevojshme për dorëheqjen e anëtarëve të Qeverisë që janë zgjedhur deputetë, për të siguruar funksionimin e rregullt të institucioneve të Kosovës.
Nga Qeveria aktuale janë zgjedhur deputetë edhe në legjislaturën e re, krahas kryeministrit Albin Kurti, edhe ministrat e zëvendësministrat: Faton Peci, Hekuran Murati, Albulena Haxhiu, Xhelal Sveçla, Donika Gërvalla-Schwarz, Arben Vitia, Ejup Maqedonci, Hajrullah Çeku, Arbërie Nagavci, Liza Gashi, Rozeta Hajdari, Fikrim Damka, Nenad Rashiq, Elbert Krasniqi, Emilja Rexhepi. /Telegrafi/Katror.info
Përgatiti:
