Kryeministri në detyrë dhe kryetari i Lëvizjes Vetëvendosje, Albin Kurti, ka nisur zyrtarisht konsultimet për formimin e qeverisë së re, duke takuar përfaqësues të partive politike nga pakicat, shkruan Katror.info.
Të mërkurën, Kurti zhvilloi takime me kryetaren e Partisë së Re Demokratike, Emilija Rexhepi, dhe kryetarin e Partisë për Liri, Drejtësi dhe Mbijetesë, Nenad Rashiq.
Sipas një njoftimi nga Zyra e Kryeministrit, këto takime janë pjesë e përpjekjeve për ndërtimin e një qeverie të re pas certifikimit të rezultateve të zgjedhjeve të 9 shkurtit dhe nisjes së afateve kushtetuese për formimin e institucioneve të reja.
Mundesh me e lexu edhe…
Gjatë takimit me Kurtin, Emilija Rexhepi, e cila njëkohësisht mban postin e zëvendëskryeministres në detyrë për Çështje të Pakicave dhe të Drejtat e Njeriut, ka konfirmuar gatishmërinë për të vazhduar bashkëpunimin me LVV-në dhe për të mbështetur formimin e qeverisë së re.
Në takimin me Nenad Rashiqin, i cili shërben si ministër në detyrë për Komunitete dhe Kthim, u diskutua për vazhdimin e bashkëpunimit në mandatin e ardhshëm. Rashiq shprehu mbështetjen e tij për Kurtin dhe vlerësoi bashkëpunimin e deritanishëm.
Kryeministri në detyrë e falënderoi Rashiqin për angazhimin dhe kontributin e tij për komunitetin serb në Kosovë dhe shprehu vullnetin për një bashkëpunim të vazhdueshëm dhe efektiv në katërvjeçarin e ardhshëm.
Ndërkohë, presidentja e Kosovës, Vjosa Osmani, ka thirrur seancën konstituive të Legjislaturës së Nëntë të Kuvendit të Kosovës për 15 prill 2025.
Komisioni Qendror i Zgjedhjeve (KQZ) certifikoi më 27 mars rezultatet përfundimtare të zgjedhjeve, sipas të cilave Lëvizja Vetëvendosje ka siguruar 48 ulëse në Kuvend, Partia Demokratike e Kosovës 24, Lidhja Demokratike e Kosovës 20, ndërsa koalicioni AAK-Nisma ka fituar 8 mandate./Katror.info
Përgatiti:
