Distria Krasniqi e Laura Fazliu janë shfaqur kur është dashur – në skenën më të madhe, në tatamin e Lojërave Olimpike. Më pas për plot pesë muaj nuk u paraqitën thuajse fare. Kanë pushuar pak javë e ndërkohë i janë kthyer stërvitjeve sfiduese në sallën e Qendrës Nacionale të Xhudos në Pejë dhe në kampe në vende të ndryshme, shkruan KOHA.
Në stërvitje e kanë kaluar edhe javën e fundit të vitit 2024, ndërsa ushtrimeve u janë kthyer menjëherë në vitin e ri.
Suksesi në “Parisi 2024” ka motivuar xhudistet që të punojnë edhe më shumë. Dhe natyrisht, të kërkojnë suksese të tjera kulmore.
Mundesh me e lexu edhe…
Në fund të korrikut të vitit të kaluar, Distria Krasniqi fitoi medaljen e argjendtë olimpike në kategorinë deri 52 kilogramë. Laura Fazliu fitoi medaljen e bronztë në kategorinë deri 63 kilogramë. Ishte suksesi dukshëm më i madh i Kosovës në sport dhe jo vetëm.
Për Olimpiadën e ardhshme, Distria e Laura, por edhe xhudistët e tjerë duhet të presin deri në vitin 2028. Por gjatë vitit 2025 ato dyja dhe të tjerat kanë plane e synime të mëdha.
“Pas Lojërave Olimpike kemi pasur pushim. Kemi nisur më ngadalë, hap pas hapi, që të përgatitemi për vitet e tjera. Për mua synim në vitin 2025 është Kampionati Botëror që mbahet në Budapest. Normalisht, edhe Kampionati Evropian në Podgoricë. Kështu që po shkojmë hap pas hapi. Jemi duke u përgatitur mirë”, ka thënë Distria për KOHËN.
Ajo nuk ka garuar më pas Lojërave të Parisit.
Distria është e vetmja prej xhudisteve me dy medalje olimpike. Në “Tokio 2021” fitoi medaljen e artë. Një medalje e tretë olimpike do të ishte e mahnitshme për Distrinë dhe Kosovën në përgjithësi.
“Nuk dua të mendoj edhe aq larg. Janë katër vjet. Nuk dihet se çka ndodh. Por unë me atë synim do të shkoj. Po punoj shumë. Synim tani e kam Kampionatin Botëror dhe pastaj do të vazhdojmë”, ka thënë Distria.
Ajo ka treguar se tashmë po e shijon më shumë suksesin se në ditët dhe javët e para pas Olimpiadës. Thotë se njëjtë i ka ndodhur edhe pas suksesit në Tokio.
“Tash kam filluar më shumë ta shijoj suksesin sesa në fillim. Kështu ka ndodhur edhe pas Lojërave Olimpike në Tokio. Nuk kam ditur, nuk kam qenë edhe aq e vetëdijshme në fillim, në muajt e parë. Por jam shumë e lumtur që e gjithë puna që e kam bërë më është shpërblyer, edhe sakrificat e mia që i kam bërë, më janë shpërblyer të gjitha. Shpresoj shumë që të marrë pjesë edhe në një Olimpiadë, dhe pse jo, edhe një medalje”, thotë Krasniqi.
Për dallim nga periudha pas Lojërave të Tokios, te Distria ka ndryshuar motivimi pas Lojërave të Parisit.
“Diçka ndryshe që më ka ndodhur pas Lojërave Olimpike në Paris është që jam shumë më e motivuar sesa pas Lojërave Olimpike në Tokio. Kur i kam përfunduar Lojërat Olimpike në Tokio e kam pasur shumë të vështirë ta gjej motivin për t’u kthyer përsëri. Por tani jam shumë më e motivuar, dhe shpresoj që ky motiv do të më mbajë”, ka treguar Distria.
Gara e parë për xhudistët elitarë të kryemjeshtrit Driton Kuka pritet të jetë Grand Slami i Parisit, në fillim të muajit shkurt. Kampionati Evropian mbahet në Podgoricë të Malit të Zi prej 23 deri më 26 prill. Botërori në Budapest të Hungarisë është prej 13 deri më 19 qershor.
“Tash duhet të punoj edhe më shumë pasi na presin gara të tjera. Nga muaji shkurt nisim në Grand Slamin e Parisit. Po shpresoj shumë që edhe atje do të fitojmë medalje”, ka thënë Laura Fazliu.
Ajo është maksimalisht e motivuar që të rritet tutje si xhudiste. Synimin e madh e ka medaljen e artë në Lojërat Olimpike “Los Angeles 2028”.
“Po normal. Në Paris e kam fituar medaljen e bronztë. Atje do të nisem për ta fituar medaljen e artë. Shpresoj shumë që do ta fitoj edhe atë”, ka theksuar Fazliu.
Trajneri Kuka ka adutë të tjerë për medalje në ngjarjet e mëdha të këtij viti. Nora Gjakova është kandidate serioze, njëjtë si Akil Gjakova. Shpërthimin në nivelin senior e kërkojnë edhe Flaka Loxha, Erza Muminoviq, Dardan Cena e xhudistë të tjerë.
Mungesa e gjatë nga garat vlerësohet se ka rritur dëshirën e top-xhudistëve për t’u paraqitur në nivelin më të lartë të mundshëm./Katror.info
Përgatiti:
