Është përuruar Muri Jeshil nga Fondacioni Jeshil në shkollën fillore Xhemail Mustafa në Prishtinë. Xhevdet Gegollaj, drejtor ekzekutiv nga Fondacioni Jeshil tha se ky mur është prototip i murit të gjelbër vertikal, i cili është krijuar së bashku me disa partnerë të tjerë, të cilët e kanë mundësuar këtë nismë.
“Është një proces i bashkëkrijimit, së bashku me partnerët e tjerë, me Fakultetin e Arkitekturës, me Fakultetin e Bujqësisë, me komunën, Drejtorinë e Hapësirave të Gjelbra dhe Parqeve si dhe UNDP, partnerin tonë, që së bashku kemi arritur ta dizajnojmë një prototip të Murit Jeshil dhe ta instalojmë këtu në shkollën fillore “Xhemail Mustafa”, tash patner i yni.”
Partnerët e Fondacionit Jeshil thanë se nga kjo nismë do të përfitojë jo vetëm shkolla, por edhe kryeqyteti në përgjithësi.
Mundesh me e lexu edhe…
Drejtoresha e Departamentit për Hapësira Publike dhe Parqe në Komunën e Prishtinës, Donika Çetta, u shpreh se ndihet e lumtur që po festohet për diçka inovative dhe të rëndësishme siç është Muri Jeshil.
“Ka qenë një periudhë e bashkëpunimit midis akterëve të ndryshëm, por që ia ka vlejtur sepse rezultati është i mahnitshëm. Është muri i parë jeshil që po bëhet në hapësirat e gjelbëra dhe si drejtori jemi të përkushtuar dhe angazhuar që këtë vizion (ta zbatojmë) jo vetëm në shkollën “Xhemail Mustafa”, por edhe në hapësirat publike të intervenojmë për një jetesë më të mirë të qytetarëve të Prishtinës”.
Ndërsa përfaqësuesja nga UNDP, Arlinda Rushaj Sadiku, tha se kjo nismë kishte filluar si testim, për t’i rritur hapësirat e gjelbra në kryeqytet, sidomos në hapësirat e betonuara, në mënyrë që të rritet cilësia e ajrit.
“Është vlerë e shtuar vendosja (e Murit Jeshil) në kuadër të një shkolle. Fondacioni Jeshil po ashtu ka zhvilluar edhe trajnime të permakulturës me nxënësit e kësaj shkolle, të cilat shpresojmë që do të vendosen si pjesë e kurrikulës në shkollë për aktivitete ekstra-kurrikulare në kuadër të shkollës. Kjo strukturë e gjelbër ofron hapësirë të testimit të gjelbërimit edhe në aspektin vertikal, jo vetëm në atë horizontal, po ashtu të mund të kenë qasje edhe fëmijët në mënyrën sesi mbillen sesi mirëmbahet bimësia dhe të kemi një të ardhme më të gjelbër, duke i trajnuar dhe i involvuar edhe fëmijët tanë”.
Shpresa Shala, drejtoreshë në shkollën fillore “Xhemail Mustafa”, u shpreh se përfituesit më të mëdhenj të Murit Jeshil do të jenë fëmijët, sepse tash e tutje nxënësit do të mund ta shohin gjithë procesin se si zhvillohen bimët.
“Orët mësimore që kanë të bëjnë me bimët, mund të zhvillohe në pjesën e oborrit te Muri Jeshil, i cili tashmë sapo u promovua. Gjithashtu fëmijët kanë mundësi ta shohin komplet procesin se si rritet një bimë, se si ujitet, por njëkohësisht edhe të edukohen edhe për kursimin e ujit sepse e gjithe ujitja do të shkojë përmes ujit të shiut, i cili shfrytëzohet për ujitjen e bimëve, kurse ana tjetër është edukimi për pastrimin e ajrit dhe mbrojtjen e mjedisit.”
Se Muri Jeshil ishte një nismë e domosdoshme e tha edhe përfaqësuesja e projektit “Healthier Kosovo”, Rina Spahiu Curri, e cila tregoi si u përzgjodh pikërisht kjo shkollë fillore ta ketë një mur të tillë.
“Kemi vendosur të bashkëpunojmë me shkollën “Xhemail Mustafa”, pikërisht e kemi zgjedhur këtë lokacion sepse është me një vend të rrethuar nga betoni, prej hapësirave më të betonuara, më të banuara dhe ka shumë studentë. Përveç strukturës që e pamë jashtë, janë edhe trajnimet që do të mbahen për fëmijë për permakulturën që t’i njoftojmë nxënësit e shkollës edhe me procesin e ujitjes edhe me procesin e kompostimit.
Në fund Gegollaj ua prezantoi Murin Jeshil dhe nga afër ua shpjegoi bimësinë e mbjellur në strukturë, ku ndër të tjera përfshiheshin sallata jeshile, borziloku, menta e rozmarina, bimë të cilat do të vëzhgohen dhe ta marrin kujdesin e duhur nga nxënësit e shkollës së parë me mur jeshil. /Katror.info
Përgatiti:
