Java e re, nafaka e re, ngjarje të reja, muzikë të re, festivale të reja, plot rekomandime të reja për këtë Monday Marks, nga Prishtina e Rahoveci, kah Prizreni e deri n’Tironë.
Një çerek viti tashmë na shkoi, ama agjenda veç sa po intensifikohet me plot sende t’reja dhe top lista javore e jona dhe e juja veç sa po pasunohet. Këtë javë ka bash ngjarje eklektike e multi-disiplinare!
E bash osht një javë e pasun: Lokali i ri Juliet of the Spirits po vjen me konceptin Beats x Bites, me art, muzikë dhe kulinarizëm ndërsa festivali Vnesht ju sjellën muzikë, raki dhe venë midis vneshtave të Rahovecit.
Mundesh me e lexu edhe…
Servis Night po kthehet me mysafir Speedy J, tash në sallën AMC. Teatri Kombëtar sjell Tennessee Williams në skenë, e orkestra frymore e Filharmonisë ka koncert në Autostrada Hangar të Prizrenit. Në Tiranë keni shfaqje fantastike të ekspertave të Shaolin në Pallatin e Kongreseve dhe ekspozitën “Shqipnia nga ajri” të Alket Sylës në COD. Lumbardhi në Prizren e përmbyll programin e hapur me një ekspozitë, e Bashkësia e Popullit të Zotit sjell balet në Teatër Kombëtar.
Me përjetu: Beats x Bites / Juliet of the Spirits, Prishtinë
Paramendoni një drekë ku beatsat shërbehen bashkë me ushqimin, dhe DJ-të nuk e bojnë veç atmosferën—ata kanihere e bojn edhe menunë. Ky osht koncepti ndërkombëtar Beats & Bites, një seri ngjarjesh live inovative që ndërthur muzikën, ushqimin dhe artin në një përvojë gjithëpërfshirëse, të ngrohtë dhe familjare. Tash koncepti i kombinimit të muzikës, artit dhe ushqimit, e frymëzume nga vala e re e koncepteve që sjellin DJ-të dhe publikun në ambiente ma intime, Juliette of the Spirits po e sjellin këtë koncept live n’Prishtinë, tu kriju një kombinim unik të artit kulinar dhe rrëfimit muzikor, në bashkëpunim me Nebula Collaborations. Super koncept, super vend, super organizim me 16 prill, me ushqim nga shefat Lindori and Marianne dhe kokteje nga Fisi. Artin e kuron Simon Kurti, me art dhe punëdore nga Granita Lila, Gisha, Arjanit Lakna, Made By Stern, etj. Muzika prej Erleta Kadrija, Adrian Berisha. Modë prej by Vlerë, Studio Njomza etj. E tema? Çka osht për ty shpija!
Me kcy: Servis Night me Speedy J / AMC Hall, Prishtinë
Speedy J osht emri artistik i Jochem Paap, një producent dhe DJ holandez nga Roterdami, i njohun për kontributin e tij të randësishëm në skenën e muzikës elektronike që nga fillimi i viteve ’90. Stili i tij muzikor përfshin një spektër të gjanë zhanresh, tu fillu nga minimall dhe ambient techno deri te eksperimentimet ma të avancume në muzikën elektronike. Tash po vjen në Kosovë, me 18 prill në AMC Hall, organizume prej dostave tonë të kolektivit Servis. Llajnap janë edhe Leo Lumezi, Leo tjetër, Pandaudio, Dina…
Me përjetu: Vnesht International Music Festival / Rahovec
Vnesht Festival osht një festival krejt i ri në skenë, ama tepër unik! Lokacioni osht n’mes vneshtave t’rrushit, te veraria Anës Vneshtit, nja 5 km afër Rahovecit, me 19 prill në ora 17:00. Festivali mbahet nën drejtimin artistik te pianistit dhe kompozitorit Robert Bisha dhe ka fokus improvizimin, pra kompozimin e çastit. Mysafir osht edhe Federico Pierantoni, trombonist italian me një karrierë të pasur si solist dhe në grupe prestigjioze jazzi italiane dhe ndërkombëtare. Aty osht natyrisht edhe Robert Bisha, pianist, kompozitor dhe multiinstrumentist ekletik, një zâ unik në muzikën bashkohore dhe jazzin avangard.
Me pa: Shfaqja “Menaxheria e Qelqtë” / Teatri Kombëtar
Një shfaqje e njohun po vjen mysafire në Teatrin Kombëtar, sot me 14 prill. “Menaxheria e Qelqtë” nga Tennessee Williams osht një dramë emocionale që trajton andrrat, kujtesën dhe arratisjen. Rrëfimi e ndjek Tom Wingfieldin, një i ri që përpiqet me shpëtu nga jeta e mbyllun me nanën e tij të pikllume dhe motrën Laurën, e cila strehohet në botën e figurinave prej qelqi. Regjia: Ilir Bokshi ndërsa luajnë: Irena Aliu, Eshref Durmishi, Qendresa Kajtazi, Mehmet Preteni.
Me ushtru: Festivali i Forcave Mistike Shaolin / Pallati i Kongreseve, Tiranë
Forcat Mistike të SHAOLIN Kung Fu po vijnë në Shqipni me 15 prill. Performanca “The Mystical Forces of the SHAOLIN Kung Fu” kanë me ardhë në Tiranë për me pru një spektakël që kombinon forcën, disiplinën dhe bukurinë e artit luftarak legjendar kinez. Zhytuni në botën magjepsëse të SHAOLIN, ku mjeshtrat kanë me ju shashtris me teknikat e tyre të jashtëzakonshme dhe me histori që kalojnë breza. Çdo performancë osht një harmoni e përsosun mes trupit dhe mendjes, një përvojë që ka me ju frymëzu po edhe me ju lonë pa fjalë.
Me dëgju: Koncert nga Orkestra Frymore e Filharmonisë së Kosovës / Autostrada Hangar, Prizren
Orkestra e Filharmonisë së Kosovës po vjen me performancë në Autostrada Hangar, Prizren! Më 15 prill 2025, nga ora 19:30, Orkestra Frymore e Filharmonisë së Kosovës ka me mbajtë koncert në Autostrada Hangar në Prizren. Nën dirigjimin e Dario Salvit dhe me pjesëmarrjen e violoçelistit virtuoz Konstantin Manaev, orkestra ka me sjellë Koncertin për violonçel dhe orkestër frymore nga kompozitori Friedrich Gulda. Po ashtu, orkestra ka me interpretu edhe vepra nga Peter Josef von Lindpaintner (Uvertura “Joko”),
Adolphe Adam (Uvertura “Mbreti i Yvetot-it”) dhe Ralph Vaughan Williams (Suitë me këngë popullore angleze).
Me pa: Ekspozita “Albania from the Air: Cultural Heritage” / COD, Tiranë
Ndoshta i keni pa librat “Albania from the Air”, nga fotografi i njoftun shqiptar Alket Islami që osht i specializum me fotografu pamje nga helikopteri. Tash ai ka dalë me një libër të ri, në 200 faqe, me fotografi spektakulare që zbulojnë bukurinë e mozaikëve antikë, kështjellave të lashta dhe lokacioneve të UNESCO-s si Butrinti, Apolonia dhe Bylisi. Libri osht lansu pak ditë ma parë, por në qendrën COD që gjendet në objektin e kryeministrisë në Tiranë, mundeni me pa ekspozitën me pamjë të trashëgimisë shqiptare, në krejt bukurinë e saj.
Me pa: Programi publik dhe ekspozita “Jashtë parashikimeve” / Kino Lumbardhi, Prizren
Lumbardhi ju fton me pa finalen e madhe të programit publik. Katër rezidentët e programit OPE.N në Prizren: Antonela Solenički, Francisco Tomsich, Maja Bojanić dhe Una Štalcar-Furač, jon tu e përfundu qëndrimin e tyne pesë javor dhe më 18 prill ju ftojnë të gjithëve me qenë pjesë e prezantimeve finale të punimeve të tyre. Ekspozita “Jashtë parashikimeve” eksploron se qysh artistët përvetësojnë, ripërdorin dhe ‘vjedhin’ – qofshin materiale, hapësira apo rrëfime – për me përkapë kuptimin dhe për t’u orientu drejt paqëndrueshmërisë. Sipas organizatorëve, “ekspozita ka me rrëfy ma shumë mbi udhën drejt mbijetesës kulturore si një strategji mbi të përshtatunit dhe të rikrijimit brenda konteksteve të ndryshueshme.”
Me pa: Shfaqje baleti “Rrugëtimi i djalit të humbur” / KBPZ, Teatri Kombëtar te Pallati i Rinisë
Po vjen një trupë e baletit amerikan, që sipas organizatorëve “sjellë për Prishtinën një natë që do të mbetet në zemër. Një rrëfim titullum “Rrugëtimi i djalit të humbur” që nuk luhet në ekran, por në skenë, i fuqishëm, frymëzues dhe i paharrueshëm!” Ballet Magnificat osht një nga trupat ma të njohuna dhe të respektume të baletit në Amerikë, e specializume në tema të njohuna biblike. Shfaqja osht me 20 prill, në ora 20:00, në Teatrin Kombëtar të Kosovës (Pallati i Rinisë) dhe ca ditë ma vonë në Gjakovë e Gjilan.
Marrë nga Suzanne Podcast./Katror.info
Përgatiti:
