Po shkojnë javët shpejt, sidomos kur ka festa (Urime Pashkët juve që festoni!), por e bonëm edhe n’ditë pushimi një top listë me top rekomandime se ku me shku, çka me bo, çka me këqyr e çka me dëgju:
Filharmonia e Kosovës po vazhdon me një agjendë të dendun eventesh, tash me dirigjentin francez Aurélien Azan Zielinski ndërsa Urta Haziraj ju sjellë muzikë baroku në Bibliotekë Kombëtare. Në Zonë keni party për me festu 10-vjetorin e kolektivit parisien Yoyaku, ndërsa në Gjilan ka shfaqje teatrale e titullume “Jam unë ajo” nga Valmira Thaqi dhe Dituri Neziraj me regji nga Erson Zymberi.
Nëse doni me përdor javën me mësu pak qysh me shkru për art, ose pak shkrim kreativ, i keni dy master-klasa apo punëtori interesante: Shkelzen Maliqi osht mësues i përkrym për kritikë arti dhe e ka punëtorinë në Hanin e 2 Robertëve, e Europe House e organizon një master klasë me Ervina Halili për shkrim kreativ.
Mundesh me e lexu edhe…
Në Kino Jusuf Gërvalla e keni një super film “Mars Express” nga shkolla franceze e filmave të animum, ndërsa në Tironë po i rekomandojmë shfaqjen premierë “Ndodhia e çuditshme e qenit në mesnatë” në teatrin Metropol dhe ekspozitën e Kairo Urovi “Endem rrugës për diku” ne hapësinën Bazament. Krejt në fund, ju sjellim edhe një rekomandim mode kosovare për merakli, nga brendi Meraki. Super listë!
Me dëgju: Koncert i Filharmonisë së Kosovës me Aurélien Azan Zielinski / Pallati i Rinisë, Prishtinë
Ky osht koncerti i fundit për muajin prill nga Filharmonia e Kosovës. Orkestra e Filharmonisë së Kosovës ka me pru një program të veçantë nën drejtimin e dirigjentit të njohur francez Aurélien Azan Zielinski. Solist i mbramjes ka me qenë Félicien Brut, i cili ka me interpretu koncertin për fizarmonikë nga Romain Dumas. Në pjesën e dytë të koncertit interpretohen:
Simfonia e kompozitorit Rafet Rudi dhe Vallet Polovecke Nr. 17 nga Alexander Borodin. Koncerti osht me 25 prill 2025, ora 19:30, në atelienë e Pallatit të Rinisë, Prishtinë.
Me kcy: 10-vjetori i Yoyaku në Zonë / Zone Club, Prishtinë
Ueee… Yoyaku n’Zone! Yoyaku osht jo veç një label muzikor dhe dyqan vinylash në Paris, po edhe një ekosistem koxha i madh e i rafinum i muzikës elektronike, veçanërisht minimal dhe techno. Osht bo një pikë referimi për artistat dhe adhuruesit e muzikës elektronike e underground, jo veç në Francë, por edhe nëpë krejt botën. Atmosfera e Yoyaku osht intime dhe cilësia e lartë e eventeve e bëjnë Yoyaku njo nga vendet ma të veçanta të natës në Paris. Yoyaku vjet e ka nisë një turne globale me festu dhjetëvjetorin e vet, tu e përfshi edhe Zone Clubin e madh në listë të kryeqyteteve nikoqire. Me 26.04.2025 muzikë kanë me lëshu: SONJA MOONEAR (shoqja e Vilalobosit :), MAXIME DB, GABBS, MARI.TE, and LEKË për një event fantastik.
Me mësu: Punëtori e kritikës së artit me Shkelzen Maliqin / Hani i 2 Robertëve, Prishtinë
Para disa mujve kom marr pjesë në një punëtori të shokut tonë Shkelzen Maliqit për shkrime dhe kritikë arti, dhe menxi s’po pres me vazhdu me këtë punëtori 3-ditore të kritikës artistike, që mbahet më 24-26 prill 2025, në Hanin e 2 Robertëve, Prishtinë. Nën udhëheqjen e filozofit dhe kritikut Shkëlzen Maliqi që osht ndoshta kritiku ma i madh i artit në troje shqiptare, mundeni me eksploru qasjet bashkëkohore të kritikës artistike përmes ligjëratave, diskutimeve dhe ushtrimeve praktike. Punëtoria osht u hapun për studentë, të rinj krijues, artistë, gazetarë dhe profesionistë të rinj të kulturës, për krejt-krejt, dhe afati i fundit për aplikim: 22 prill 2025.
Me dëgju: Koncert solistik “Baroque Wind” i Urta Haziraj / Biblioteka Kombëtare, Prishtinë
Një dashni e veçantë e kahershme e Urtës për artin e muzikës së barokut po merr formë të koncertit. Meloditë e bukura të kësaj epoke të cilat janë punuar enkas për këtë Recital kanë mu performu nga soprano e njohun me datë 22 të kësaj jave. Nën përcjelljen e pianistit Lekë Salihu dhe mysafires, violonçelistes Gresa Broqi ju keni me pasë mundësinë me frymu e mu kthyi pas në kohë, përmes veprave muzikore që japin ngrohtësi e mesazhe shprese.
Me mësu: Masterklasë – Arti i shkrimit kreativ me Ervina Halilin / Europe House, Prishtinë
A keni qef me shkru? A keni nevojë për këshilla qysh me shkru dhe çka me shkru? Europe House ju fton me “përqafu fuqinë e fjalës së shkruar per të shënuar Ditën botërore të librit dhe të Drejtës së autorit!” nëpërmjet një masterklase më 23 prill, me Ervina Halilin, një nga poetet dhe shkrimtaret e shquara të gjeneratës së saj. Librat e saj janë përkthy në disa gjuhë evropiane dhe janë prezantu në panaire librash anembanë Evropës. Ervina vjen në Europe House për me realizu një masterklasë që ndahet në tre sesione ku mundeni me mësu se qysh të frymëzoheni, shkrimin si akt social dhe historik apo narrativat vizuale. Çfarë ju pret? Një Masterklasë interaktive mbi shkrimin kreativ, pastaj prezantimi i romanit “Mali i qumështit” dhe krejt në fund, pak muhabet mbi karrierën letrare të Ervina Halilit.
Me këqyr: Premierë filmi “Mars Express” / Kino Jusuf Gërvalla, Pejë
Nuk na bjen shpesh në Kosovë me pru premiera filmash të animum françez, edhe pse Franca osht nana e baba e stripave. Eh, tash e keni një premierë në Kino Jusuf Gërvalla të “Mars Express”, një film i vizatum shumë i njoftun francez i zhanrit sci-fi & thriller, me 26 prill, ora 19:00 – mundësume nga IF Cinema dhe Ambasada Franceze në Prishtinë. Ngjarja: në vitin 2200, detektivja private Aline Ruby dhe partneri i saj android, Carlos Rivera, nisen në një mision për me gjetë një haker të famshëm. Hetimi i tyne i çon në zemër të qytetit Noctis në Mars, ku zbulojnë një komplot të rrezikshëm që përfshin fermat e trurit, korrupsionin dhe një çikë të zhdukun që mban një sekret që mundet me ndryshu krejt të ardhmen e njerëzimit dhe robotëve. Filmi vjen me titra shqip dhe hyrja osht falas!
Me pa: Shfaqja teatrale “Jam unë ajo” / Teatri i Gjilanit
Sonte me 21 prill, në ora 20:00, n’Teatrin e Gjilanit vjen shfaqja “JAM UNË AJO”
nga Valmira Thaqi dhe Dituri Neziraj me regji nga Erson Zymberi dhe aktoret Tringa Hasani, Semira Latifi. Çka ndodh në shfaqje? “Jam unë Ajo” duket si një histori intime e dy grave, Dija dhe Vesa, e që “shndërrohet në një udhëtim prekës dhe shpeshherë i papritun përmes botës së emocioneve të heshtura. Nën sipërfaqen e një realiteti të zakonshëm, zbulohet një e vërtetë që shpesh fshihet: çfarë ndodh me një grua pas lindjes, kur përballë buzëqeshjes së foshnjës qëndron një heshtje e thellë brenda saj?” Intriguese…
Me pa: Ekspozitë e Kairo Urovi “Endem rrugës për diku” / Bazament Art Space, Tiranë
Kairo Urovi osht një fotograf italo-shqiptar që jeton dhe punon në Londër. Puna e tij fokusohet në temat e identitetit gjinor, intimitetit dhe familjes. Ai osht pjesë e komunitetit queer/jobinare dhe osht i njoftun për fotografi të që eksplorojnë përvojat personale dhe sociale. Në vitin 2024, Urovi fitoi vendin e tretë në çmimin prestigjioz LensCulture Portrait me serinë e tij “Light are the wounds, heavy is the wind”, një koleksion autoportretesh që trajton transidentitetin dhe përvojat e tij personale. Tash po vjen me një ekspozitë të titulluar “Endem rrugës për diku”, që tregohet në hapësinën artistike Bazament, nga 24.04.2024 deri 30.05.2025.
Me pa: Shfaqje premiere “Ndodhia e çuditshme e qenit në mesnatë” / Teatri Metropol, Tiranë
Nëse nuk e keni lexu librin “The Curious Incident of the Dog in the Night-Time” të Mark Haddon, lexojeni. Osht ndër librat ma t’mirë të 20 viteve të fundit, një roman që ju shtin në botën intriguese të një djali 15-vjeçar që osht në spektrumin autist. E tash paska dalë edhe shfaqja, dhe Teatri Metropol në Tiranë po e sjell historinë e Christopherit (regjia nga Justin Anderson), një djaloshit 15-vjeçar në spektrin e autizmit, i cili si detektiv përpiqet me zbulu se kush e ka vra qenin e fqinjës. Shfaqja sjell në skenë botën e tij të brendshme në mënyrë vizuale dhe emocionale, tu sfiduar perceptimet për neurodiversitetin dhe tu trajtu me ndjeshmëri temat e familjes, të vërtetës dhe identitetit personal.
M’u zbukuru: Aksesorët e brendit Merakï / Prishtinë
Merakï osht një markë e modës që ndërthur mjeshtërinë tradicionale shqiptare me dizajnin modern. E themelume me qëllimin për me rujt dhe festu artizanatin shqiptar, Merakï ofron çanta lëkure të lezeçme të punume me dorë, bizhuteri nga gurë natyralë dhe veshje minimaliste që pasqyrojnë një stil të thjeshtë ama të sofistikuar. Frymëzume nga fjala “meraki”, që për krejt meraklitë e modës nënkupton shpirti, kreativiteti dhe dashnia në atë që bon, ky label kosovar synon mi fuqizu artizanët dhe me nxitë pak punën autentike përmes seneve, aksesorëve, teshave të dizajnume me kujdes. Për ma shumë informacion, vizitoni faqen e tyne zyrtare: merakilabelled.com.
/Katror.info
Marrë nga Suzanne Podcast.
Përgatiti:
