Monumenti i pavarësisë NEWBORN ka marrë pamje të re për Ditën e Pavarësisë së Kosovës, duke reflektuar një nga temat më të diskutuara në vend dhe në mbarë botën – inteligjencën artificiale.
“E pëlqeve apo e urreve, e deshe apo ia pate frikën, Inteligjenca Artificiale është këtu, edhe çdo ditë e më shumë po bëhet pjesë e pashmangshme e jetëve tona,” ka shkruar Fisnik Ismaili, ideatori i monumentit duke sqaruar se pse ka zgjedhur këtë vit këtë temë.
Ai ka theksuar se përmes ngjyrosjes së NEWBORN-it, ata synojnë të përfaqësojnë Kosovën me tema aktuale ndër vite.
Mundesh me e lexu edhe…
“Po si çdo vjet monumenti NEWBORN ka një temë e cila përfshin Kosovën në botë duke filluar kur e kemi bërë për ngrohjen globale, për të drejtat e grave, dhunimet ndaj grave. Të gjitha gjërat që kanë ndodhur në Kosovë, ne mundohemi përmes NEWBORN-it me i paraqit si diçka që e bën Kosovën pjesëmarrëse në botë. Këtë vit ideja ka dalë në moment të fundit. Gjithmonë e bëjmë një analizë, mundohemi të gjejmë diçka aktuale. Për momentin nuk ka asgjë më aktuale se inteligjenca artificiale mënyra se si ajo po bëhet pjesë integruese e jetës. Deshe apo jo, është e pashmangshme. Është mirë t’ua rikujtosh njerëzve se është ndihmesë, por edhe paraqet rreziqe të cilat nuk dimë”, ka deklaruar Ismaili.
Monumenti NEWBORN është një nga simbolet më ikonike të Kosovës, i vendosur në Prishtinë. Ai u zbulua më 17 shkurt 2008, ditën kur Kosova shpalli pavarësinë nga Serbia. Fillimisht, monumenti kishte shkronja të mëdha të verdha që formonin fjalën “NEWBORN”, duke simbolizuar lindjen e Kosovës si një shtet i ri.
Çdo vit, më 17 shkurt, në Ditën e Pavarësisë, monumenti ngjyroset me një dizajn të ri, duke pasqyruar tema të ndryshme.
Viteve të kaluara, NEWBORN u ngjyros me flamujt e shteteve njohëse të pavarësisë së Kosovës, ngjyrat e uniformave të ushtarëve të vendeve që e kishin ndihmuar Kosovën në luftën për çlirimin nga pushtuesit serbë.
Në vitin 2016 ‘NEWBORN’ u emërtua me emrin ‘Izolim’, që kishte për qëllim të përçonte mesazhin e izolimit. Shkronjat kishin marrë ngjyrë të kaltër si qielli dhe ishte mbuluar me gjemba.
Telat me gjemba kishin thirrjen për botën për të gjetur zgjidhjen dhe për integrimin e Kosovës në Bashkimi Evropian.
Në përvjetorin e 14-të, ‘NEWBORN’ u kushtohej grave dhe moton kishte ‘Gratë për Gratë’./Katror.info
Përgatiti:
