Pas lëvizjes që filloi në Kroaci për të bojkotuar marketet si kundërshtim ndaj rritjes së çmimeve, një nismë e tillë ka filluar edhe në Kosovë. Një grup i quajtur “Bojkoto Marketet” është krijuar në Facebook me qëllim që të mobilizojë konsumatorët për bojkotimin e marketeve në Kosovë si përgjigje ndaj çmimeve të pajustifikueshme.
“Nuk do të pranojmë të paguajmë më shumë se që duhet. Nuk ka nevojë as të protestojmë në rrugë, vetëm do t’i bojkotojmë marketet deri në produkte minimale si uji apo detergjenti. Gjithçka tjeter BOJKOT deri në ulje te çmimeve,” thuhet në njoftim.
Sipas njoftimit bojkoti do të fillojë në fillim të shkurtit dhe do të zgjasë deri në ulje të çmimeve.
Mundesh me e lexu edhe…
“Nëse nuk shohim lëvizje në çmime bojkoti do të vazhdojë dhe do të publikojmë datat e radhës. Bashkohu edhe ti në këtë nismë. Për herë të parë le të dëgjohet zëri i konsumatorit,” thuhet në njoftim.
Gjithçka nisi në Kroaci, ku qytetarët, të revoltuar nga çmimet e larta, vendosën të bojkotojnë supermarketet. Lëvizja “Përshëndetje Inspektor”, organizoi një bojkot njëjavor si protestë ndaj rritjes së pakontrolluar të çmimeve. Përveç bojkotit të produkteve specifike, sipas medias kroate index.hr, më 31 janar qytetarët u ftuan të mos blejnë asgjë!
Rezultatet e para? Më 24 janar, shitjet ranë me 50% në Kroaci. Presioni funksionoi—rrjeti më i madh i marketeve, Konzum, uli çmimet e 250 produkteve, ndërsa qeveria kroate caktoi ulje për 70 produkte të tjera.
Por kjo s’ndalet vetëm në Kroaci! Lëvizja është përhapur në Serbi, Maqedoni të Veriut, Mal të Zi, Bosnje e Hercegovinë dhe Slloveni, ku qytetarët po bëjnë thirrje për bojkot të ngjashëm.
Edhe në Kosovë çmimet janë rritur ndjeshëm në dy vitet e fundit, veçanërisht për produktet bazë.
Indeksi i tërësishëm i harmonizuar i çmimeve të konsumit në vend në vitin 2024 ishte më i lartë në një mesatare prej (1,6 %) krahasuar me vitin 2023. Kjo ngritje i ka prekur edhe produktet bazë, si buka dhe drithërat (2,5%), kafja, çaji dhe kakao (8,0%), pemët (4,8%), lëngjet nga pemët dhe perimet (5,3%), produktet e kujdesit personal (3,7%), etj. Megjithatë deri në formimin e grupit në Facebook, Kosova nuk i është bashkuar nismës rajonale për bojkot. /Katror.info
Përgatiti:
