Një gotë qumësht në ditë ul rrezikun e kancerit të zorrës sipas një studimi

Një studim i kryer në Mbretërinë e Bashkuar ka zbuluar prova të reja që tregojnë se njerëzit që konsumojnë më shumë kalcium në dietën e tyre ekuivalente me një gotë qumësht në ditë mund të ndihmojnë në uljen e rrezikut të kancerit të zorrës.

Studiuesit shqyrtuan dietat e mbi gjysmë milioni grash gjatë një periudhe 16-vjeçare dhe zbuluan se perimet me gjethe të errëta, buka dhe qumështet bimore të pasura me kalcium gjithashtu ofronin një efekt mbrojtës.

Ata gjithashtu gjetën më shumë prova se konsumimi i tepërt i alkoolit dhe mishit të përpunuar ka efektin e kundërt, duke rritur rrezikun për këtë sëmundje, shkruan BBC, përcjell Katror.info.

Organizatat për luftën kundër kancerit thonë se një dietë e shëndetshme dhe e balancuar, mbajtja e një peshe të shëndetshme dhe lënia e duhanit janë mënyrat më të mira për të ulur rrezikun e kancerit të zorrës.

Një rishikim i fundit ka zbuluar se produktet e bylmetit mund të ndihmojnë në uljen rrezikun e kancerit të zorrës

Ky studim, i realizuar nga Universiteti i Oksfordit dhe Cancer Research UK, sugjeron se kjo ndodh për shkak të kalciumit, nga burime me ose pa bylmet. Një shtesë prej 300 mg kalcium në ditë në dietë, ose një gotë e madhe qumësht, ul rrezikun me 17%.

Dr. Keren Papier, udhëheqëse e studimit, theksoi se ky hulumtim vë në pah rolin mbrojtës të mundshëm të bylmetit, kryesisht për shkak të kalciumit, në zhvillimin e kancerit të zorrës.

Drithërat e mëngjesit, frutat, drithërat e plota, karbohidratet, fibrat dhe vitamina C gjithashtu treguan se ulnin rrezikun, por efekti i tyre ishte i vogël.

Konsumimi i tepërt i mishit të përpunuar dhe mishit të kuq, si dhe alkoolit, rrit rrezikun e kancerit të zorrës. Studimi gjeti prova të tjera që një gotë e madhe verë në ditë, ose 20 gram alkool, rrit rrezikun me 15%, ndërsa konsumimi i mish të kuq ose të përpunuar, si një fetë proshutë, rrit rrezikun me 8%.

Kuantifikimi i këtyre përqindjeve është i vështirë sepse rreziku i kancerit të zorrës ndryshon nga stili i jetesës, dieta, zakonet dhe gjenetika e secilit individ.

Kalciumi është një mineral i rëndësishëm për forcimin e kockave dhe shëndetin e dhëmbëve, por ka prova në rritje që ai mbron edhe nga disa lloje kanceri. Burimet kryesore të kalciumit përfshijnë qumështin, kosin dhe djathin.

Ai gjendet gjithashtu në pije soje dhe orizi, bukë të bardhë, arra, fara dhe fruta si fiqtë e thatë, lakra e gjelbër dhe sardele të konservuara.

Studimi sugjeron që kalciumi mund të mbrojë kundër kancerit të zorrës duke u lidhur me acide biliare dhe acide yndyrore të lira në zorrën e trashë, duke ulur efektet e tyre potencialisht kancerogjene.

Kanceri i zorrës është shumë i zakonshëm, me rreth 44,000 raste çdo vit në Mbretërinë e Bashkuar, duke e bërë atë kancerin e katërt më të zakonshëm. Shumica e rasteve ndodhin te të moshuarit, por incidenca është në rritje te të rinjtë nën 50 vjeç, megjithëse arsyeja mbetet e paqartë. Faktorët që kontribuojnë përfshijnë dietën e dobët dhe obezitetin.

Simptomat e kancerit të zorrës përfshijnë ndryshime në zakonet e zorrëve, si jashtëqitje më të shpeshta ose kapsllëk, gjak në jashtëqitje ose gjakderdhje nga fundi i zorrës, humbje të pashpjegueshme të peshës, lodhje ose mungesë frymëmarrjeje, këshillohet të konsultoheni me një mjek nëse shfaqen ndonjë nga këto simptoma.

Ky studim ishte i natyrës vëzhguese dhe nuk mund të japë prova përfundimtare për lidhjen midis kalciumit dhe mbrojtjes nga kanceri.

Sidoqoftë, studiuesit theksojnë se ky është hulumtimi më i madh i realizuar deri më tani mbi dietën dhe kancerin e zorrës, duke mbështetur përfundimet e studimeve të mëparshme.

Ekspertët theksojnë se gjysma e rasteve të kancerit të zorrës mund të parandalohen me një stil jetese më të shëndetshme.

Për ata që nuk konsumojnë qumësht, kalciumi mund të merret nga burime të tjera, si brokoli apo tofu./Katror.info