Presidentja e Kosovës, Vjosa Osmani, ka udhëtuar për në Bullgari, me ftesë të Mbretit të Jordanisë, Abdullah II, dhe presidentit të Bullgarisë, Rumen Radev, për të marrë pjesë në Takimin e Nivelit të Lartë të Procesit Aqaba për Ballkanin III, që do të mbahet në Sofje, shkruan Katror.info.
Në kuadër të vizitës, presidentja Osmani do të mbajë fjalim në hapje të Samitit dhe do të zhvillojë takime bilaterale me disa nga liderët pjesëmarrës. Tema e diskutimeve do të jetë thellimi i marrëdhënieve bilaterale, avancimi i bashkëpunimit në fushën e sigurisë, dhe forcimi i përpjekjeve për stabilitetin rajonal.
Ky takim, i organizuar nën patronazhin e Mbretërisë Hashemite të Jordanisë dhe Republikës së Bullgarisë, ka për qëllim të forcojë bashkëpunimin rajonal dhe ndërkombëtar në luftën kundër terrorizmit dhe ekstremizmit. Procesi Aqaba, i iniciuar nga Mbreti Abdullah II në vitin 2015, ka luajtur një rol kyç në koordinimin e përpjekjeve globale kundër këtyre kërcënimeve dhe në adresimin e sfidave të sigurisë.
Mundesh me e lexu edhe…
Në fjalën e saj, presidentja Osmani do të theksojë angazhimin e Kosovës në luftën kundër terrorizmit dhe radikalizmit, si dhe rëndësinë e bashkëpunimit të ngushtë me aleatët dhe partnerët strategjikë. Ajo gjithashtu do të riafirmojë angazhimin e Kosovës për sigurinë rajonale dhe për forcimin e kapaciteteve të institucioneve të sigurisë të Kosovës, në përputhje me standardet euroatlantik./Katror.info
Përgatiti:
