Presidentja e Republikës së Kosovës, Vjosa Osmani, ka shprehur ngushëllimet e saj pas lajmit për vdekjen e Papa Françeskut, i cili ndërroi jetë këtë të hënë në moshën 88-vjeçare, shkruan Katror.info.
Në një postim në platformën X, Presidentja Osmani theksoi kontributin e jashtëzakonshëm të Papës në promovimin e dhembshurisë, përulësisë dhe drejtësisë, duke vlerësuar trashëgiminë që ai la pas si një pasuri e përhershme për njerëzimin.
“Populli i Republikës së Kosovës i bashkohet miliona njerëzve anembanë botës në zi për vdekjen e Shenjtërisë së Tij, Papa Françeskut – një zë i dhembshurisë, përulësisë dhe drejtësisë në kohën tonë. Trashëgimia e tij do të jetojë në jetët e panumërta që ai preku. Ne qëndrojmë me të gjithë ata që përcjellin mesazhin e tij të qëndrueshëm të shpresës, paqes dhe dinjitetit njerëzor,” shkroi ajo.
Mundesh me e lexu edhe…
Vdekja e Papa Françeskut u konfirmua nga Kardinali Kevin Farrell, i cili njoftoi se Ati i Shenjtë ndërroi jetë në Vatikan, më 21 prill 2025. Papa Françesku, me emrin e lindjes Jorge Mario Bergoglio, u bë udhëheqës i Kishës Katolike në vitin 2013, pas dorëheqjes së Papa Benediktit XVI. Ai ishte Papa i parë nga Amerika Latine dhe u shqua për përpjekjet e tij për reforma brenda Kishës dhe për avokimin e të drejtave të të varfërve dhe të margjinalizuarve./Katror.info
Përgatiti:
