Pas protestave kundër rritjes së çmimeve në rajon, edhe në Kosovë po shqyrtohet bojkoti i marketeve të mëdha si reagim ndaj abuzimit me çmimet. Përfaqësuesit e konsumatorëve kërkojnë masa urgjente, ndërsa qytetarët ankohen për pagat e ulëta dhe shpenzimet e larta që po rëndojnë ekonomitë familjare, shkruan Katror.info.
Qytetarët e Kosovës e përshkruajnë situatën ekonomike si gjithnjë e më të vështirë. Sipas tyre, fuqia blerëse ka rënë ndjeshëm, ndërsa produktet bazë janë shtrenjtuar ndjeshëm.
“Çmimet janë të shtrenjta. Nëse e krahasojmë pagën e sotme me pagën e para katër apo pesë vjetësh, ka fuqi blerëse së paku 50-60 përqind më pak, dhe artikujt kryesorë bazë që i përdorim në jetën e përditshme janë rritur edhe 100 përqind. Për shembull, një burek në furrë para tre vitesh ka qenë 70 cent, ndërsa tani është 1 euro e 40 cent, që do të thotë një rritje 100 përqind,” tha një qytetar për RTK.
Mundesh me e lexu edhe...
“Mjaft vështirë, kjo është rritje abnormale, s’di tani kush i ka fajet. Duhet bërë si në Kroaci, të bojkotojmë marketet e mëdha, sidomos,” u shpreh një qytetar tjetër.
Një krahasim me situatën në vendet tjera të Evropës ka nxitur edhe më shumë pakënaqësi. “Në Gjermani pagat janë 2,000-3,000 euro dhe çmimet janë si tek ne. Tani vlerësojeni vetë,” komentoi një tjetër qytetar.
Si pasojë e pakënaqësisë, shoqata “Konsumatori” ka paralajmëruar se do ta përkrahë bojkotin, nëse deri më 10 shkurt nuk ka ndonjë reagim nga bizneset dhe institucionet. “Ne duhet të vetëmbrohemi. Përndryshe, do të përshkallëzojmë protestat,” deklaroi Elatin Kaçaniku nga kjo organizatë.
Bojkoti si reagim rajonal
Protesta kundër rritjes së çmimeve fillimisht nisi në Kroaci, ku qytetarët vendosën të bojkotojnë supermarketet. Lëvizja “Përshëndetje Inspektor” organizoi një bojkot njëjavor, që uli shitjet me 50% dhe detyroi rrjetin më të madh të marketeve, Konzum, të ulte çmimet e 250 produkteve. Gjithashtu, qeveria kroate caktoi ulje për 70 produkte të tjera.
Shembulli kroat u ndoq edhe nga qytetarët e Serbisë, Maqedonisë së Veriut, Malit të Zi, Bosnje e Hercegovinës dhe Sllovenisë. Ata po i bëjnë thirrje konsumatorëve të mos blejnë produkte specifike dhe, në raste të caktuara, të mos blejnë fare për një ditë të tërë.
Edhe në Kosovë, çmimet janë rritur ndjeshëm, sidomos për produktet bazë si buka, drithërat, kafja dhe pemët. Indeksi i çmimeve të konsumit ishte 1.6% më i lartë në vitin 2024 krahasuar me 2023-in. Megjithatë, deri më tani Kosova nuk i është bashkuar zyrtarisht nismës rajonale. Një grup në Facebook ka nisur diskutimet për organizimin e bojkotit, por ende nuk ka një datë të saktë për fillimin e tij.
Mbetet të shihet nëse presioni qytetar do të detyrojë tregtarët dhe institucionet të marrin masa për stabilizimin e çmimeve./Katror.info
Përgatiti:
