Këngëtari britanik, Sir Paul McCartney, paralajmëroi se inteligjenca artificiale mund t’i “përdorë” artistët nëse ndryshimet e propozuara me ligjin për të drejtat e autorit hyjnë në fuqi në Britani, shkruan The Guardian.
Propozimet ligjore mund t’i ndikojnë negativisht autorët dhe artistët, duke çuar në “humbje të kreativitetit,” u shpreh ai për BBC.
Përdorimi i materialeve të mbrojtura me të drejtat e autorit për t’i trajnuar modelet e AI është subjekt i një debati të ri qeveritar, përcjell Katror.info.
Mundesh me e lexu edhe…
“Ka të rinj, djem dhe vajza, që shkruajnë këngë të bukura dhe nuk i gëzojnë të drejtat për to, dhe s’kanë asgjë që mund të bëjnë. Dhe kushdo që dëshiron mund t’i shfrytëzojë ato”, u shpreh McCartney, njëri nga anëtarët e Beatles. “Realiteti është se paratë po shkojnë diku… Dikush po paguhet, kështu që pse të mos jetë personi që u ul dhe shkroi Yesterday?”
Ka mungesë qartësie lidhur me faktin nëse është e drejtë dhe etike që materiali i mbrojtur nga të drejtat e autorit të përdoret për t’i trajnuar modelet që fuqizojnë valën e fundit të mjeteve të AI. Rastet ligjore janë ngritur nga kompani dhe individë në industrinë kreative, duke argumentuar se materialet e tyre po përdoren pa licencë.
Për dallim, disa organizata botuese dhe media kanë nënshkruar marrëveshje licencimi me kompanitë e AI për të lejuar përdorimin e materialit të tyre.
Nuk është hera e parë që McCartney shpreh shqetësime mbi kërcënimin që AI mund të ketë për artin.
Në dhjetor, ai paralajmëroi se AI mund të “mbizotërojë” dhe iu bashkua aktorëve Julianne Moore, Stephen Fry dhe Hugh Bonneville në nënshkrimin e një peticioni i cili parasheh: “Përdorimi i palicencuar i veprave krijuese për të gjeneruar AI është kërcënim i madh dhe i pandershëm për njerëzit që kanë punuar këto vepra dhe nuk duhet të lejohet.”
Shkrimtarja Kate Mosse ka mbështetur një fushatë paralele për ndryshime në ligjin mbi të dhënat, që do të lejonte zbatimin e ligjit ekzistues për të drejtat e autorit në Mbretërinë e Bashkuar. Kjo do t’u mundësonte krijuesve të negociojnë për pagesa të drejta kur licencojnë materialin e tyre.
Qeveria ka deklaruar se debati parlamentar, i cili zgjat deri më 25 shkurt, do të shqyrtojë pikat kyçe të çështjes, përfshirë mënyrat për ta përmirësuar besimin ndërmjet sektorëve kreativ dhe AI, dhe si mund të licencohen dhe shpërblehen krijuesit për përdorimin e materialit të tyre.
McCartney gjithashtu bëri thirrje për rishikimin e planeve nga qeveria.
“Ne jemi njerëzit, ju jeni qeveria. Detyra juaj është të na mbroni”, tha ai. “Kështu që, nëse kaloni një ligj, sigurohuni që t’i mbroni autorët kreativë, artistët kreativë, ose të kundërtën s’do të keni më të tillë”.
Në nëntor 2023, McCartney dhe Sir Ringo Starr krijuan këngën Now And Then duke përdorur teknologjinë AI për t’i punuar vokalet e John Lennon nga një demo e regjistruar në vitin 1977./Katror.info
Përgatiti:
