Për herë të parë në Kosovë, gjegjësisht në Klinikën e Neonatologjisë të Qendrës Klinike Universitare të Kosovës (QKUK), do të nisë zbatimi i Skriningut Neonatal Metabolik. Ky program ka për qëllim identifikimin e hershëm të sëmundjeve metabolike dhe gjenetike te foshnjat e porsalindura, duke mundësuar trajtim të shpejtë dhe efikas.
Drejtori i Klinikës së Neonatologjisë, Luan Morina, ka konfirmuar se ky projekt tashmë është në fazën finale të testimit dhe se së shpejti do të fillojë zyrtarisht aplikimi i tij. “Është siguruar hapësira, janë sjellë pajisjet moderne, si dhe është trajnuar stafi, përshirë laborantët, biokimistët dhe infermierët që do të angazhohen në procesin e skriningut”, ka thënë Morina për Radio Kosovën.
Sipas tij, skriningu do të kryhet brenda 24 deri në 48 orëve pas lindjes dhe do të mundësojë diagnostikimin e sëmundjeve që mund të mos shfaqin simptoma në fazat e para të jetës, por që mund të kenë pasoja serioze nëse nuk zbulohen me kohë.
Mundesh me e lexu edhe…
“Ne do të testojmë të gjitha foshnjat e porsalindura dhe do të shohim nëse ato vuajnë nga ndonjë çrregullim gjenetik, si hipotiroidizmi kongjenital, fenilketonuria, fibroza cistike, galaktozemia dhe atrofia muskulore spinale”, ka shtuar ai.
Disa nëna, foshnjat e të cilave kanë pasur probleme të ngjashme, kanë treguar për Radio Kosovën se diagnostikimi i vonuar ka qenë një nga sfidat kryesore që kanë hasur.
Zyrtarët e QKUK-së besojnë se ky program do të ndihmojë në eliminimin e problemeve të hershme shëndetësore te foshnjat, duke rritur shanset për trajtim të suksesshëm. Ndërkaq, Ministria e Shëndetësisë ka deklaruar se ky hap shënon një arritje të rëndësishme në sistemin shëndetësor të vendit, duke ndihmuar në diagnostikimin dhe trajtimin e hershëm të sëmundjeve te të porsalindurit./Katror.info
Përgatiti:
