Procesi i nivelizimit të çmimit të barnave në Kosovë, po vazhdon të përballet me sfida, duke shkaktuar edhe mungesë të ilaçeve në treg.
Ligji për çmimet e produkteve medicinale që hyri në fuqi në muajin shkurt, po zbatohet pjesërisht e kjo edhe për shkak të përditësimit të vazhdueshëm të listës zyrtare të çmimeve.
Ministria Shëndetësisë sërish ka bërë përditësimin e Listës zyrtare të çmimeve të produkteve medicinale, edhe pse një gjë e tillë ishte bërë së fundmi më 24 mars.
Mundesh me e lexu edhe…
Në vendimin e MSh-së të marrë më 4 prill 2025 thuhet se “Përditësohet Lista zyrtare e çmimeve të produkteve medicinale të deklaruara nga Bartësit e autorizim marketingut në Kosovë apo përfaqësuesit e autorizuar të Bartësit të autorizim marketingut e miratuar me Vendimin e Ministrit me nr.05-10072, datë 23.12.2024 dhe Korrigjuar me Vendimin e Ministrit me nr.05-10256, datë 31.12.2024 sipas propozimit nr.pot.05-2324, datë 28.03.2025 të Komisionit për përcaktimin e çmimeve të produkteve medicinale”.
Tutje në vendin theksohet se është korrigjuar afati i vlefshmërisë së çmimeve të produkteve medicinale i përcaktuar në Listën zyrtare të përditësuar me datë 24.03.2025.
“Obligohen qarkulluesit me shumicë dhe pakicë që t’i përmbahen çmimeve të përcaktuara në Listën e cila është pjesë e këtij vendimi. Obligohet AKPPM të ndërmerr të gjitha veprimet për zbatimin e këtij vendimi”, thuhet në vendimin e MSh-së të datës 4 prill.
Në Listën e përditësuar më 4 prill figurojnë 3076 produkte medicinale, ku krahasuar me listën e përditësuar më 24 mars, i bie të jenë shtuar 64 produkte më shumë.
Sipas kësaj, disa prej produkteve medicinale janë liruar, disa janë shtrenjtuar dhe disave nuk iu ka ndryshuar çmimi fare nëse bëhet krahasimi me çmimet që ishin përditësuar në muajin mars.
Shembull: Paracetamol 120mg/5ml që është prodhim i Alkaloid në Shkup, në listën e 24 marsit, çmimi me shumicë i figuronte 1.08, marzha ishte 0.27, çmimi me marzhë 1.36, kurse çmimi me pakicë ishte 1.46 euro. Ndërkaq në listën e përditësuar së fundmi pra me 4 prill, çmimi i tij është 1.61 me shumicë, marzha është 0.40, çmimi me marzhë 2.01 dhe çmimi me pakicë është 2.17 euro.
Gjithashtu edhe Diazepam 10mg/2ml (10 ampulla), që është tretësirë për injeksion, e cila gjithashtu është prodhim i Alkaloidit, me listën e përditësuar më 4 prill, ka pësuar rritje të çmimit.
Në listën e 24 marsit, çmimi i tij figuronte 1.05 me shumicë, marzha e fitimit ishte 0.26 dhe çmimi me marzhë ishte 1.31, kurse çmimi me pakicë ishte 1.42 euro.
Në listën e çmimeve të përditësuar më 4 prill çmimi i Diazepamit (10 ampulla) është 1.81 me shumicë, marzha është 0.45, çmimi me marzhë figuron 2.26, ndërkaq me pakicë çmimi është 2.44 euro.
Ndërkaq çmimi nuk ka ndryshuar për Vitamin C të 500mg. Në listën e çmimeve të përditësuara më 24 mars, ky produkt që prodhohet nga Replek Pharm në Shkup, çmimin me shumicë e kishte 8.45, marzha ishte 2.11, çmimi me marzhë 10.56 dhe çmimi me pakicë 11.41.
I njëjti çmim figuron edhe listën e përditësuar më 4 prill.
Përditësimin e listës zyrtare të çmimeve- verisioni 1.2 e gjeni këtu.
Për përditësimit të listave, Shoqata e Distributorëve Farmaceutik, javë më parë për Telegrafin kishte paralajmëruar mundësinë e mungesës së barnave.
SHDPFMK ka theksuar se nëse do të merret parasysh metodologjia e çmimit mesatar nga vendet referente dhe çmimet e importit të vitit 2025, atëherë beson që situata mund të stabilizohet, në të kundërtën Shoqata ka shtuar se gjatë tërë vitit do të mund të ballafaqohemi me mungesa të produkteve të cilat për shkak të çmimit të pavolitshëm nuk do të mund të importohen dhe tregtohen.
Përcaktimi i çmimeve të barnave bëhet duke u bazuar në Ligjin për Çmimin e Produkteve Medicinale, i cili e parasheh që bazë e përcaktimit të çmimit është metodologjia e çmimeve referente të jashtme, të vendeve siç janë Shqipëria, Maqedonia e Veriut, Mali i Zi, Kroacia dhe vendi i origjinës së produktit.
Lista zyrtare e çmimeve të produkteve medicinale, e miratuar me Vendim nr. 208/XII/2024 të Ministrit të Shëndetësisë, ka hyrë në fuqi më datë 01.02.2025, kurse Ligji për çmimin e produkteve medicinale nr. 08/L-220 ka hyrë në fuqi në gusht të vitit 2023. /Telegrafi/Katror.info
Përgatiti:
