Pas ankesës së paraqitur nga CEL Kosova dhe Dylberizm kundër Koalicionit për Familje, ky Koalicion ka marrë gjobën e parë nga Paneli Zgjedhor për Ankesa dhe Parashtresa (PZAP) për përdorimin e gjuhës së urrejtjes kundër LGBTI+.
PZAP të mërkurën i shqiptoi gjobë këtij subjekti politik në lartësi prej 4.500 eurosh. Sipas Panelit Zgjedhor për Ankesa dhe Parashtresa (PZAP), sjelljet e Koalicionit bien ndesh me Ligjin për Zgjedhjet e Përgjithshme.
Njëkohësisht, PZAP ka konstatuar se Kodi i Mirësjelljes i detyron të gjitha subjektet politike, kandidatët, anëtarët e subjekteve dhe mbështetësit e tyre që ta respektojnë këtë kod me qëllim të krijimit të kushteve që gjatë periudhës së fushatës, veprimet e subjekteve politike të jenë në një atmosferë të tolerancës demokracisë, paqes dhe respektit për sundimin e ligjit.
Mundesh me e lexu edhe…
“Gjuha e përdorur nga subjektit politik Koalicioni për Familjen ndaj LGBTI+ në tubimet zgjedhore, është në kundërshtim me Kodin e Mirësjelljes për Subjektet Politike, Mbështetësit e tyre dhe Kandidatët, gjegjësisht me dispozitat e nenit 34 LZP-së (Ligjit për Zgjedhjet e Përgjithshme) ku janë të përcaktuara veprimet e ndaluara të subjekteve politike dhe me këto veprime janë shkelur dispozitat e nenit 34 paragrafi 1 nën paragrafi 1.11 të LZP-së”, thuhet ndër të tjera në vendimin e PZAP-së.
Në vendim thuhet se Koalicioni për Familje ka përdorur qëllimshëm gjuhën e urrejtjes, fyerjen dhe denigrimin e komunitetit LGBTI+ në fushatën e saj zgjedhore, dhe paneli vlerësoi se veprimet e koalicionit bien ndesh me rregullat edhe etikën zgjedhore.
Organizatat Joqeveritare CEL Kosova dhe Dylberizm, më 19 janar, parashtruan ankesë kundër deklaratave të kandidatëve të Koalicionit për Familje. Në këtë ankesë shkruhej se kandidatët e këtij subjekti gjatë një tubimi, si dhe në paraqitjet e tyre në programet televizive, kanë bërë disa shkelje të Ligjit për Zgjedhjet e Përgjithshme të Republikës së Kosovës, Kodit të Mirësjelljes, Ligjit për Mbrojtje nga Diskriminimi dhe Kushtetutës së Republikës së Kosovës.
“Veprimet e kandidatëve përfshijnë përdorimin e gjuhës nxitëse dhe diskriminuese ndaj komunitetit LGBTI+, promovimin e përçarjes dhe frikës mes qytetarëve të Kosovës, si dhe nxitjen e urrejtjes përmes përmbajtjes gojore dhe vizuale”, thuhet në reagimin e këtyre organizatave./Katror.info
Përgatiti:
