Idetë e ndryshme për ushqim, servim dhe dekorim t’pjatave festive janë element i randësishëm i cilësdo festë. Kujdesi për detaje, servim e dekorim asht hap i randësishëm dhe që e ban diferencën n’raste ma speciale. Pjatat festive nime i japin hijeshi edhe ma shumë secilës tryezë, veçanarisht kur kemi motive t’mëdhaja për me nda gëzimin me ma t’dashtunit tanë.
A je ka planifikon me organizu nji “Baby Shower” qoftë për vehte, apo dikand që e ke afër zemrës, por nuk po din se çka me përgatitë a porositë, por n’anën tjetër po e don me e bo nji “Blue Themed Party”? Mos ta ndinë, ne kemi ardhë me disa rekomandime dhe ide interesante.
Duhet me ditë që kur gostitë ma shumë mysafir ( ma shumë se 10 persona), nji tryezë ku secili mundet me u vet-shërby (byfe e hapun) kish me qenë nji zgjidhje ideale dhe praktike – sepse jo çdokush ka qejf me hangër çka i caktohet. Andaj edhe ne i kemi zgjedhë disa “Finger Food” dhe disa sygjerime pijesh ku secili mundet me e gjetë vehtën.
Mundesh me e lexu edhe…
1. MEZE E AMBËL – PJATË AMBËLSIRASH “BLUE”
Mezja e ambël / plata me ambëlsina asht nji prej alternativave t’cilat mundesh lehtësisht me e përgatitë n’kushte shtëpije. Për me realizu nji pjatë t’ngjashme, përdor produkte me nuancë t’bardhe dhe t’kaltërt. E mira e këtyre mezeve asht që mundesh lehtësisht me gjetë ambëlsina t’ndryshme n’dyqane dhe me e përgatitë shpejtë. Kështu ti mundesh me ble politanka me shije vanille, keksa me limon, marshmallows t’bardha, haribo t’kaltërta, karamele dhe bonbone t’ndryshme me po t’njejëtën ngjyrë si dhe shtapiqa me çokollatë t’bardhë. Edhe ambëlsinat si perecat me çokollatë t’bardhë, macaroons shkojnë shumë n’pjata t’tilla. Shkurt e shqip – leje imagjinatën me t’udhëheqë.
2. BLUE PIJE FRESKUESE (JO ALKOOLIKE)
Natyrisht që n’nji nejë t’tillë ku motoja për dekorim dhe servim asht ngjyra specifike “BLUE” , edhe pijet freskuese duhet me qenë n’harmoni me pjesën tjetër t’tryezës. Kështu, nëse ke mysafir që preferojnë mos me pi alkool, limonatat e ndryshme t’kombinume me shije boronice, por edhe ato t’krijume me ngjyrosës t’kaltërt për ushqim dhe ambëlsina janë opsione perfekte. Servoji n’gota elegante t’çfarëdoshme, apo edhe n’shishe t’bukura xhami sikurse n’shembulln tonë.
3. BLUE CAKE POPS
Cake Pops, ose kekët n’shkoptha janë trendi i ri. Interesant me u pa, pak harxhim edhe shumë lehtë t’ndame n’sasi t’vogla – këta kekë nime po e kryjnë t’vehtën. E këto lehtësisht mundesh me i përgatitë n’shtëpi, ose edhe me i porositë n’aq copë sa ta merr mendja që ke nevojë.
4. BLUE DONUTS
Për me ju ofru variacione ma shumë mysafirëve, n’vend t’tortës, ne t’sygjerojmë me ble ose porositë ambëlsina ma t’vogla – ku nuk ka nevojë kërkush me u marrë me thika e pjata. Donuts me gllazurë t’kaltër asht nji prej rekomandimeve t’tona praktike kësaj radhe.
5. BLUE COTTON CANDY PROSECCO
E për kando që e din që ka merak me festu t’u pi, ideja e gotave t’prosecco-s me pambuk sheqer asht diçka që mirëpritet prej shumëkujt. Mjafton me zgjedhë nji Prosecco dhe me marr n’dyqan pambuk sheqer t’kaltërt (zakonisht gjinden t’paketume n’gota plastike). Vendos prosecco-n n’gotat e dëshirume, shpërndaje sipër rrethit t’gotës pambuk sheqerin – kaq.
6. BRUSKETA ME GJIZË DHE BORONICA
Brusketat me gjizë dhe boronica mundesh lehtësisht me i ba n’shtëpi. Rreshk bukët integrale, merr pak gjizë e përzije me pak mjaltë. Lyji brusketat me gjizën e mjaltësume , shto sipër boronica e pak gjethe mente po deshe dhe servoji. Jemi t’bindun që kushdo që pëlqen shije interesante ka me u fascionu prej tyre.
7. POPCORN
Kokoshkat / kokicat jana prej atyne ushqimeve që lehtësisht mundesh me i përgatitë për çfarëdo rasti, e pse jo edhe për nji baby shower. E bardha e kokicave shkon n’mënyrë perfekte me t’kaltërtën e ushqimeve e ambëlsinave t’tjera. E ma e mira e tyne asht që edhe mundesh me i përgatitë lehtësisht vet, por edhe mundesh me i ble t’gatshme n’dyqan.
8. BLUE MEZE PREJ DJATHËRASH DHE RRUSHI
Nëse veç ke ftu mysafirë që kanë merak me pi, asht gjynah mos me ofru edhe meze. Mezja me djathëra dhe rrush t’zi shkon shumë, veçanarisht nëse gjenë rrush t’zi lëkura e t’cilit anon ka ngjyra e kaltër. Merr djathëra t’ndryshëm sikurse janë mocarella, parmezani, djathi i dhisë, por edhe kjathi i mykun (Blue cheese) dhe bashkoji n’dërrasë mezeja apo n’pjatë për servim. Poashtu, pos rrushit ti mundesh me shtu edhe manaferra dhe boronica, meqë i përafrohen t’kaltrës bajagi shumë.
9. KEKSA T’NJELBËT ME SOS TZAZIKI DHE ULLINJ
Nëse veç ke merak me i bashkangjitë tryezës edhe diçka t’njelbët, atëherë keksat e kripun me sosin e famshëm grek Tzaziki dhe ullinjt e zi kallamata janë perfekt për tryezën e kaltër, meqë ullinjt anojnë kah nuanca e t’kaltrës dhe e komplentojnë moton e tavolinës tande festive. Ti poashtu mundesh që n’vend t’keksave me përdorë bukë t’rreshkun e me kriju brusketa prej tyre.
10. “BLUE” CUPCAKES
Nëse ke qejf mos me e maltretu as vehtën e as tjerët për pjata e enë, ataherë mënyra ma mirë e ma praktike për servim t’ambëlsinave asht me porositë ose gatu Cupcakes – meqë hahen ma lehtë, por edhe e kompletojnë pamjen e secilës tryezë.
Pavarësisht se çka vendosë me provu e gatu, ne urojmë që n’fund ti e t’tjerët me u nda t’kënaqun. Kujdes mos përgatit edhe tepër shumë ushqim e me t’shku dam – andaj, mos ha me sy, por mendo mirë për racionet që i servon.
Ti njilloj mundesh me kqyrë edhe çka me përgatit’ nëse nji pink baby shower po e gostitë. Gëzuar! /katror.info/
Ky artikull është përgatit’ nga Kaltrina Zhushi. Për me pa receta të mira dhe te shëndetshme, mundeni me e vizitu blogun e saj në Instagram @gurmaneria
Përgatiti:
