Prokuroria Themelore në Prishtinë ka autorizuar Policinë e Kosovës që të ndërmarrë veprime hetimore lidhur me çdo abuzim apo keqpërdorim të votave, pas rënies së ueb faqes së Komisionit Qendror të Zgjedhjeve në ditën e zgjedhjeve.
Kështu bëri të ditur për Telegrafin Zejnullah Gashi, kryeprokurori i Prishtinës.
Në një përgjigje për Dukagjinin, Zyra për Komunikim Publik e Prokurorisë Themelore në Prishtinë konfirmoi mëngjesin e së martë se tashmë po trajtohet çështja në fjalë.
“Prokuroria Themelore në Prishtinë ka autorizuar që Policia e Kosovës, në bashkëpunim dhe koordinim me institucionet kompetente, të ndërmarrë veprime apo masa hetimore për secilin abuzim apo keqpërdorim të votave pas rënies së ueb-faqes së KQZ-së”, tha Gashi.
Në mbrëmjen e 9 shkurtit, në ditën e zgjedhjeve janë hasur probleme në faqen e Komisionit Qendror të Zgjedhjeve.
Ndërkaq lidhur me këtë ka reaguar edhe komapania e cila ka zhvilluar sistemin e menaxhimit të votimit, shkruan Katror.info.
Kompania, CACTTUS sh.a. ka sqaruar publikisht shqetësimet e ngritura për performancën e sistemit të menaxhimit të votimit, të kontraktuar nga OSBE dhe zhvilluar për Komisionin Qendror të Zgjedhjeve (KQZ) të Kosovës. Në një deklaratë, kompania ka pranuar se gjatë ditës së zgjedhjeve, më 9 shkurt 2025, faqja e internetit e KQZ-së pati probleme me performancën, duke shkaktuar vonesa në publikimin e të dhënave zgjedhore.
Sipas CACTTUS, këto vështirësi u shkaktuan nga një volum i paprecedent trafiku që mbingarkoi konfigurimet ekzistuese të aplikacionit Cloudflare, shërbim ky që menaxhohet nga Agjencia e Shoqërisë së Informacionit (ASHI) dhe KQZ. Problemi, sipas kompanisë, nuk lidhej me funksionalitetin themelor të aplikacionit të votimit, i cili ka operuar normalisht deri në përfundimin e procesit të votimit në orën 19:00.
CACTTUS njoftoi se pasi identifikoi problemin dhe bashkëpunoi me ekipin teknik të KQZ-së, konfigurimi i Cloudflare u optimizua për të përballuar trafikun e lartë. Si rezultat, sistemi rifitoi funksionalitetin e plotë në mesnatë, ndërsa publikimi i rezultateve u bë në orën 05:00 më 10 shkurt.
Kompania gjithashtu theksoi se gjatë dhe pas zgjedhjeve, faqja e internetit e KQZ-së dhe infrastruktura qeveritare e Kosovës ishin shënjestër e sulmeve kibernetike të tipit DDoS, të cilat synonin të bllokonin aksesin në platformë. Sipas CACTTUS, aplikacioni i votimit mbeti i sigurt dhe funksional, ndërsa sulmet kibernetike paraqitën sfida për qasjen e pandërprerë të publikut në sistem. /Katror.info
Përgatiti:
