Rina Lipa, artistja dhe motra e yllit të njohur Dua Lipa, ka ndarë me British Vogue një udhëzues të veçantë për jetën kulturore dhe gastronomike të Kosovës, vendin ku ka kaluar pjesën më të madhe të fëmijërisë së saj, shkruan Katror.info.
Në artikullin për British Vogue, Rina shpalos lidhjen e thellë me Prishtinën dhe bukuritë e Kosovës, duke e përshkruar si një vend ku ndjehet si në shtëpi, edhe pas kthimit të saj në Londër kur ishte 14 vjeç.
“Sapo kisha mbushur gjashtë vjeç kur familja ime u kthye në Kosovë nga Londra. Për tetë vitet e ardhshme, vendin më të ri në Evropë do ta quaja shtëpi, duke vallëzuar në Teatrin Kombëtar të Kosovës e duke vrapuar pa kufij në malet e Rugovës. Edhe pse u ktheva në Angli kur isha 14 vjeç, vitet e mia formuese që i jetova në kryeqytetin e Kosovës, Prishtinë, shtrihen në identitetin tim, si fije në një tapet. Motra ime më e madhe, Dua, vëllai im më i vogël, Gjin, dhe unë ende e quajmë atë shtëpi”, shprehet Lipa për British Vogue.
Mundesh me e lexu edhe…
“Sot për sot, mundohem të shkoj atje sa më shumë që është e mundur. S’kam emocione më të mëdha se kur shkoj në Aeroportin e Prishtinës. Ekziston optimizëm tani në Kosovë: Viti 2024 shënoi 25 vjet nga përfundimi i luftës dhe janarin e këtij viti, qytetarëve të Kosovës iu mundësua të udhëtojnë pa viza brenda BE-së. Si shtet, Kosova ka vetëm 17 vjeç – ka shpallur pavarësinë në vitin 2008 – dhe popullsia e saj është jashtëzakonisht e re. Më shumë se gjysma e kosovarëve janë nën 30 vjeç, kështu që jeta natës është crazy – imagjino bare që struken rrugëve me drita neone dhe nata që nuk mbaron në asnjë vend ku të shkosh (diskot si Zona dhe Gate janë dy prej vendeve më të njohura në kryeqytet)”, thotë Rina Lipa për British Vogue.
“Shpesh, kur jam në Prishtinë, vizitoj me shoqërinë Soma Book Station – një miks i bibliotekës e restorantit ku mund t’i shfletoj librat e letërsisë klasike – para se të shkojmë te Kafet e Rakisë, rrugë e shtruar me kalldrëm që është e mbushur me kafene, ku të panjohurit lidhin miqësi me gota rakish. Mundohem të mos largohem nga Kosova pa vizituar as Tiffany Restaurant; familja ime ka ngrënë gatimet e tyre të shtëpisë për vite me radhë”, shton Lipa për British Vogue.
Normalisht, Lipa nuk la pa permendur edhe Sunny Hill Festival, që është ngjarje e rëndësishme për të dhe familjen e saj, si mundësi unike për të sjellë artistë ndërkombëtarë në Kosovë.
“Ka skenë të gjallë arti në gjithë Kosovën, veçanërisht gjatë verës – nga Dokufesti në Prizren deri te festivali ynë Sunny Hill në Prishtinë, ku yjet si Miley Cyrus, Burna Boy dhe – natyrisht – Dua, e ndajnë skenën me muzikantë lokalë si Yll Limani, Ledri Vula dhe shumë të tjerë. Sunny Hill është tejet i rëndësishëm për ne, sepse kur jetonim në Prishtinë në vitet 2000, ishte e rrallë të shihnim artistë ndërkombëtarë që performonin. Tani ne i ftojmë ata – dhe të gjithë të tjerët – t’i përjetojnë bukuritë e Kosovës me ne”, përfundon Lipa për British Vogue.
Rina Lipa është aktore dhe modele në rritje, që bashkëpunon me disa marka të njohura të modës. Që nga një moshë e re, Rina ka qenë artiste e pasionuar dhe në rritje. Pas paraqitjeve në reklama, ajo e kuptoi dashurinë e saj për artet e performancës. Filloi me trajnime në balet dhe shpejt zbuloi pasionin për aktrim. Më pas, ajo nisi të marrë mësime dramatike për gjashtë vjet për të përmirësuar aftësitë e saj. Lipa gjithashtu ka marrë pjesë në garën e vallëzimit “The Rock Challenge”. Në vitin 2014, ajo u nderua me Çmimin Jack Petchey, që njihet për të rinjtë e jashtëzakonshëm të moshës 11-25 vjeç nga Londra dhe Essex./Katror.info
Përgatiti:
