Rrjeti i Grave të Kosovës (RrGK) ka reaguar ashpër ndaj përdorimit të gjuhës fyese, denigruese dhe diskriminuese kundrejt grave politikane në diskursin publik, veçanërisht gjatë kësaj periudhe të ndjeshme të formimit të legjislaturës së re dhe institucioneve shtetërore, shkruan Katror.info
Në deklaratën e tyre, RrGK thekson se pjesëmarrja e grave në jetën politike është një e drejtë themelore në çdo shoqëri demokratike, dhe çdo përpjekje për t’i margjinalizuar apo sulmuar ato përbën një shkelje të rëndë të të drejtave të njeriut dhe një kërcënim serioz ndaj proceseve demokratike në vend.
“Gjuha publike ka peshë të madhe dhe ndikim të drejtpërdrejtë në jetën dhe sigurinë e politikanëve, veçanërisht të grave,” thuhet në reagim. RrGK dënon fuqishëm gjuhën e urrejtjes, seksizmin dhe stereotipet gjinore, duke theksuar se këto fenomene nuk kanë vend në diskursin politik apo publik.
Organizata u bën thirrje partive politike, përfaqësuesve institucionalë, mediave dhe opinionit publik që të kontribuojnë në krijimin e një ambienti politik të dinjitetshëm, gjithëpërfshirës dhe të bazuar në respekt e barazi.
“Nuk mund të ketë institucione të forta dhe përfaqësim të drejtë pa barazi gjinore,” thekson më tej RrGK, duke shtuar se sulmet ndaj grave në politikë janë sulme të drejtpërdrejta ndaj vetë demokracisë.
Në fund, RrGK u kërkon organeve kompetente që të monitorojnë dhe të reagojnë ndaj gjuhës diskriminuese, si dhe të ndërmarrin masa të duhura për mbrojtjen e të drejtave dhe dinjitetit të secilit individ, pa dallim gjinie.
Rrjeti riafirmon përkushtimin si organizatë për të mbështetur dhe fuqizuar gratë në politikë dhe për të qëndruar në mbrojtje të barazisë gjinore dhe drejtësisë, duke theksuar se ky është momenti për të ndërtuar një kulturë të re politike – një kulturë të respektit dhe barazisë../Katror.info
Përgatiti:
