Sekretari amerikan i Shtetit, Marco Rubio deklaroi se procesi i negociatave që synon t’i japë fund luftës së Rusisë kundër Ukrainës i ka sjellë palët më afër paqes, megjithëse duhen ende shumë përpjekje për të arritur një marrëveshje përfundimtare.
Marco Rubio e bëri këtë deklaratë në një intervistë për Fox News Radio, transkripti i së cilës u publikua nga Departamenti Amerikan i Shtetit, transmeton Ukrinform, përcjell Telegrafi.
“Unë mendoj se ajo që kemi parë është se ne jemi më afër – nuk jemi afër paqes. Dua të them, mendoj se ka shumë për të punuar, por ne jemi më afër sesa ishim dy javë më parë ose më afër se gjashtë muaj më parë”, ka thënë ai.
Mundesh me e lexu edhe…
Rubio theksoi se lufta në Ukrainë vazhdon prej tre vjetësh dhe presidenti amerikan dëshiron që ajo të përfundojë.
“Unë mendoj se të gjithë duhet të pajtohen se kjo luftë duhet të përfundojë dhe pyetja është se si ta përfundoni atë në një mënyrë që të mos rifillojë më. Pra, plani në thelb ishte, a mund t’i bëjmë këta njerëz të ndalojnë të qëllojnë kundër njëri-tjetrit dhe të ulen dhe të kenë një negociatë se si t’i jepet fund kësaj përgjithmonë. Ky ka qenë qëllimi i Presidentit”, shpjegoi Sekretari i Shtetit i SHBA-së.
Ai tha se pa një “angazhim të mirë” nga delegacioni ukrainas javën e kaluar në Arabinë Saudite:
“Ata ranë dakord të ndalonin të shtënat dhe të ‘ngrinin’ gjithçka aty ku është, dhe ne mund të flasim se si t’i jepet fund kësaj përgjithmonë”.
Tashmë, sipas Rubios, synimi është të merret “diçka e tillë” nga rusët.
Në këtë kontekst, ai e quajti produktiv takimin e javës së kaluar ndërmjet të dërguarit të posaçëm Witkoff dhe Putinit.
“Nuk ishte humbje kohe,… por ne do të dimë më shumë nesër pasi presidenti të flasë me (Vladimir) Putinin. Dhe shpresojmë se do të jemi në një pozicion më të mirë”, përfundoi Sekretari i Shtetit i SHBA-së./Katror.info
Përgatiti:
