E përditësuar, 15:22 –
Sekretari i Përgjithshëm i NATO-s, Mark Rutte, gjatë qëndrimit në Prishtinë, në takim me Presidenten Osmani diskutuan për bashkëpunimin ndërmjet Kosovës dhe NATO-s, sigurinë rajonale si dhe dialogun mes Kosovës dhe Serbisë, shkruan Katror.info.
Në konferencën e përbashkët për media, Rutte theksoi se NATO mbështet plotësisht dialogun e lehtësuar nga Bashkimi Evropian dhe i bëri thirrje Kosovës dhe Serbisë që të bëjnë “kompromise të duhura” për normalizimin e marrëdhënieve. Ai u shpreh se e kupton vështirësinë e këtyre vendimeve, por sipas tij, “duhet të shihet pamja më e gjerë”.
Mundesh me e lexu edhe…
“NATO-ja do të vazhdojë të mbështesë plotësisht normalizimin e marrëdhënieve midis Beogradit dhe Prishtinës, udhëhequr nga BE-ja. Është e vetmja mënyrë për të zgjidhur çështjet e pazgjidhura dhe për të ofruar një të ardhme stabile, duke mbrojtur të gjitha komunitetet. Për ta shtyrë përpara këtë dialog, të dyja palët duhet të shfaqin fleksibilitet, të bëjnë kompromise të duhura dhe të fokusohen në dobitë afatgjata,” tha Rutte.
Ai garantoi gjithashtu se përkushtimi i NATO-s për stabilitetin dhe paqen në Kosovë mbetet i palëkundur. “Trupat tanë punojnë pa pushim për të siguruar një ambient me rend dhe siguri në përputhje me mandatin e KFOR-it. Një rajon më i sigurt nënkupton më shumë siguri për të gjithë zonën e NATO-s,” theksoi ai, duke shtuar se bashkëpunimi mes institucioneve të Kosovës dhe KFOR-it duhet të thellohet edhe më tej.
Nga ana e saj, Presidentja Osmani vlerësoi rolin e NATO-s në sigurinë e Kosovës dhe shprehu përkushtimin e vendit për të forcuar kapacitetet e ushtrisë. Ajo nënvizoi se Kosova tashmë ka arritur të ndajë 2% të GDP-së për mbrojtjen dhe se synon ta rrisë këtë përqindje në të ardhmen.
“Para 25 vitesh shumica prej nesh ishim të rinj që dolëm t’i prisnim ushtarët e NATO-s si heronj. Populli i Kosovës do të jetë gjithmonë mirënjohës ndaj çdo shteti që e mbrojti vendin tonë. Synimi ynë strategjik është të mos krijohen vakume sigurie në rajon. Kosova ka arritur nivelin prej 2% të GDP-së për ushtri dhe synojmë ta dyfishojmë këtë nivel, duke përfshirë edhe investime në dronë,” tha Osmani.
Ajo foli edhe për sulmet ndaj ushtarëve të KFOR-it në veri të Kosovës, duke theksuar se mungesa e përgjegjësisë për autorët ka inkurajuar sulme të tjera nga grupet kriminale. “Ne i bashkohemi thirrjeve të NATO-s për përgjegjësi në lidhje me sulmet ndaj trupave të KFOR-it në veri, të organizuara nga strukturat serbe, ku mbetën të plagosur 93 ushtarë, tre prej tyre rëndë. Kosova mbetet një aleate e përkushtuar për stabilitetin e rajonit dhe integrimin e tij euroatlantik,” tha ajo, duke ritheksuar se është koha që Kosova të bëhet pjesë e NATO-s.
Pas takimit me Presidenten Osmani, Rutte pritet të zhvillojë një takim edhe me Kryeministrin e Kosovës, Albin Kurti./Katror.info.
***
Presidentja e Kosovës, Vjosa Osmani, ka pritur në takim Sekretarin e Përgjithshëm të NATO-s, Mark Rutte, në kuadër të vizitës së rëndësishme në Prishtinë.
Pas përfundimit të bisedimeve, Presidentja Osmani dhe Sekretari i Përgjithshëm Rutte do të mbajnë një konferencë për media, ku pritet të japin më shumë detaje për temat që janë diskutuar.
Përpara ardhjes së sekretarit të NATO-s, autoritetet kosovare kanë marrë masa të shtuara sigurie, duke siguruar një ambient të qetë dhe të sigurt për vizitën.
Mark Rutte, gjatë qëndrimit të tij në Prishtinë më 11 mars, pritet të ofrojë garanci se kontingjenti evropian brenda misionit të NATO-s në Kosovë, KFOR, do të mbetet në vend, pavarësisht ndonjë lëvizjeje të mundshme të forcave ushtarake amerikane./Katror.info
Përgatiti:
