Presidenti i SHBA-së, Donald Trump, ka marrë vendim që ta shtyjë për 30 ditë vendimin për të aplikuar 25 për qind tarifave ndaj mallrave të importuara nga Kanadaja, raporton “BBC”.
Vendimi ka ardhur pas bisedës telefonike që Trump ka pasur të hënën me kryeministrin kanadez Justin Trudeau.
Trudeau në një postim në platformën “X” ka thënë se do të punojnë së bashku me SHBA-në për të zgjidhur çështjet.
Mundesh me e lexu edhe…
Ai ka njoftuar se Kanadaja do të zbatojë një plan kufitar 1.3 miliard dollarësh kanadezë duke shtuar helikopterë të rinj, teknologji dhe personel për t’u përkujdesur për kufirin dhe se do të “shtohen burimet për ta ndaluar rrjedhën e fentanylit”.
Ai ka thënë se afro 10 mijë trupa do të përkujdesen për mbrojtjen e kufirit. Do të shpallen kartelet e drogës si organizata terroriste dhe do të formohet një forcë e përbashkët SHBA – Kanada për ta luftuar krimin e organizuar, fentanylin dhe shpëlarjen e parave.
E presidenti i SHBA-së, Donald Trump, ka thënë se diskutimi me Trudeaun ka shkuar shumë mirë.
Ai ka konfirmuar vendimin për shtyrjen e aplikimit të tarifave.
“Kanadaja është pajtuar që të kemi një kufi verior të sigurtë”, shkroi Trump në “Truth Social”.
Ngjashëm SHBA-ja ka shtyrë edhe aplikimin e tarifave ndaj Meksikës për 30 ditë.
Presidentja meksikane, Claudia Sheinbaum, ka deklaruar të hënën në një konferencë për media se SHBA-ja do të shtyjë vendosjen e tarifave prej 25% për mallrat nga Meksika për një muaj pas një “bisedë të mirë” që kishte me Trumpin.
Sheinbaum ka thënë se ajo dhe Trump kanë arritur një marrëveshje, duke përfshirë përforcimin e kufirit nga Meksika duke vendosur në mënyrë të menjëhershme 10,000 trupa të Gardës Kombëtare, raporton BBC.
Edhe presidenti Trump e ka konfirmuar “pauzën e menjëhershme” në tarifat e parashikuara për mallrat nga Meksika përmes një postimi në Truth Social.
“Ne ramë dakord të ndalojmë menjëherë tarifat e parashikuara për një periudhë njëmujore gjatë së cilës do të kemi negociata të kryesuara nga sekretari i Shtetit, Marco Rubio, sekretari i Thesarit, Scott Bessent dhe sekretari i Tregtisë Hoëard Lutnick, dhe përfaqësues të nivelit të lartë të Meksikës”, ka shkruar ai.
Trump kishte thënë se një taksë 25% e importit për mallrat nga Meksika do të fillonte të martën, së bashku me tarifat për mallrat nga Kanadaja dhe Kina./Katror.info
Përgatiti:
