Shpesh na është dëshmuar se Kosova është shtet i të rinjve të talentuar, e pikërisht këto fjalë i përshkruajnë më së miri nxënësit e Innovation Academy në Vushtrri. Përkushtimi edhe inovacioni i tyre të lë pa fjalë.
Enes Fejza tash e katër vjet është pjesë e kësaj shkolle. Ai ka realizuar projekte të shumta dhe kulmin e ka aritur tash duke jetësuar një platformë të parë sociale në gjuhën shqipe. Ngjashëm sikur mediat e sotme sociale, edhe në plaformën e realizuar nga Enesi, njerëzit mund të komunikojnë me të tjerët, të postojnë edhe të shohin postimet e njëri-tjetrit.
“E kam bërë në shqip që të bëhet pak më e famshme, sepse nëse do ta bënim në anglisht është si krejt tjerat e në shqip nuk është asnjë,” shpjegon Enesi në një bashkëbisedim me Katror.info, ndërsa na e shpjegon hap pas hapi se si funksionon platforma në fjalë.
Mundesh me e lexu edhe…
Në kohën kur inteligjenca artificiale ka marrë hov, Enesi shpjegon se në kuadër të platformës së zhvilluar nga ai, përdoruesit mund të komunikojnë me një robot.
“Mundesh me komuniku me një robot i cili të kthen përgjigje vetë. Janë disa përgjigje që t’i kthen pak a shumë që i kam programuar, nëse klikojmë këtu djathtas të dalin.”
Një tjetër projekt interesant është “Booking Kosova”, në të cilin nxënësi Lorik Rama i ka vendosur hotelet edhe disa nga vendet turistike të Kosovës që ta lehtësojë orientimin e turistëve në Kosovë.
“Kjo është webfaqja e Booking Kosova, është një webfaqe shumë e thjeshtë, shumë e lehtë për ta përdorur. Mund të shikosh disa nga hotelet në mbarë Kosovën që janë, disa prej më të mirave. Po ashtu janë edhe disa prej qyteteve dhe dukurive natyrore të Kosovës. Po ashtu e kemi edhe pjesën e profilit, ku mund t’ia ndërrosh emrin, t’ia vendosësh një emër të ri, emailin, fotografitë dhe të gjitha gjërat. I kemi edhe pjesën për bookings: completed bookings, cancelled… i kemi settings-at, kartelën payement”, shpjegon ai.
Feride Uka është një tjetër nxënëse shumë e përkushtuar e kësaj shkolle. Ajo synim të së ardhmes thotë se e ka që të motivojë vajzat e tjera dhe të heqë krejt dyshimet se vajzat nuk mund të arrijnë në fushën e TIK-ut veç pse janë vajza.
“Nëse e marrim krahasim me vitet e tjera ne e vërejmë që numri i vajzave në fushën e programimit veçse është rritur dhe është rritur në mënyrë tejet të madhe, për shkak të shembullit që na ka dhënë profesori ynë që në Fakultetin e Inxhinierisë Elektrike dhe Kompjuterike në kohën e tij kanë qenë vetëm katër vajza, kurse tash vazhdojmë që të shikojmë numrin e madh të vajzave në këtë fushë. E vërejmë që jo vetëm se janë barazu, por ndoshta edhe e kanë kaluar numrin e djemve edhe mendoj që janë shumë më të suksesshme në këtë fushë se djemtë,” shprehet Feridja, ndërsa shpjegon programet me të cilat merret në Innovation Academy.
“Projekti që mundem me theksu është ai për arsimin në Kosovë, një webfaqe që është e punuar me HTML dhe CSS, por në fakt në vete përmban larmi të përmbajtjes, për shkak se e paraqet gjendjen e arsimit në Kosovë edhe i paraqet shumë ide që janë mbledhur prej njerëzve të ndryshëm edhe prej njerëzve që kanë opinione të ndryshme se qysh me pasë ne një arsim më të mire,” shpjegon ajo.
Edhe Alketa Islami ka dashur që të provojë të mësojë diçka të re që do t’i ndihmonte të orientohet në karrierë.
“Edhe pse projekte kemi shumë sidomos te kapitulli i HTML dhe CSS kemi marrë dizajne të ndryshme online, edhe i kemi punuar ato, mirëpo një prej projekteve është faktikisht projekti im i parë, i punuar me HTML dhe CSS krejt në fillim kur kemi filluar t’i mësojmë këto gjuhë programuese, është me temë sociale: “Vetëdijësimi i të rinjve për të mos përdorur substanca narkotike dhe mos të abuzohet me to,” shprehet ajo.
E prapa krejt këtyre talentëve të së ardhmes qëndron guximi edhe ideja inovative e Ensar Bajramit, themelues i Innovation Academy, dhe puna e madhe e stafit të tij për të sjellë një akademi për teknologji dhe gjuhë të huaja, shkathtësi këto thelbësore për këtë shekull. Fillimin thotë të mos e kishte të lehtë.
“Ne në fillim para se ta jetësojmë idenë, kur kemi biseduar me disa njerëz, na kanë thënë se ideja është shumë e mirë, mirëpo nuk është për Vushtrri, kështu pak e kanë nënvlerësu qytetin në të cilin u linda dhe u rrita. Kanë thënë është ideja për qytete pak më të mëdha, më të zhvilluara. Mirëpo tash pas katër viteve e kemi dëshmuar të kundërten, e kemi dëshmuar që Vushtrria ka nxënës edhe të rinj jashtëzakonisht të talentuar edhe pse jo edhe qytetet tjera në të ardhmen,” shprehet Bajrami në një intervistë për Katror.info.
Ai thotë se sot nxënësit punojnë me programe të njëjta si gjithandej në botë dhe madje janë pjesë e garave të ndryshme ndërkombëtare.
“Është një program ndërkombëtar me të cilin punojnë shumë shkolla në Evropë e kryesisht në Amerikë. Ne kemi pasur rast që të jemi pjesë e shumë garave ndërkombëtare. Së fundmi ishte ajo e gjuhës angleze edhe patën mundësi që të hyjnë dhe komunikojnë me moshatarët e tyre anëkend botës edhe jo që ishin të barabartë mirëpo ishin edhe më të mirë nxënësit tonë. Kështu që unë e konsideroj se të rinjtë tanë janë shumë të talentuar sidomos në fushën e teknologjisë, mirëpo edhe të gjuhëve të huaja. Vetëm duhet ta kenë një vend ose mentorë të duhur që t’i orientojnë duhur në karrierë edhe me pasë vendin ku ta shprehin kreativitetin dhe shkathtësitë që i kanë përbrenda vetes së tyre,” shprehet ai.
Të rinjtë shembull si këta me të drejtë duhet të presin nga institucionet ose kompanitë që kanë mundësi, një përkrahje më të madhe.
“Ka disa kompani, sidomos një është “Diari” në Vushtrri e cila ka marrë përsipër që t’i financojë disa nga nxënës. Janë momentalisht tre nxënës, që janë shumë të talentuar. Nuk i kemi përzgjedhur për shkak të kushteve ndoshta, mirëpo për shkak të talentit që e kanë edhe kjo kompani po i financon. Mirëpo, kemi raste të shumta kur prindi apo nxënësi vjen dhe thotë unë po kam dëshirë për shkak se kjo është e regjistruar si biznes dhe ne mbahemi financiarisht prej pagesave të nxënësve, mirëpo nëse ka talent, shfaq talent ne ua ofrojmë këtë mundësi pa kurrfarë problemi. Do të ishte shumë mirë që Komuna të bashkëpunojë me ne në këtë aspekt dhe të merrte përsipër financimin e disa të rinjve të cilët shprehin talent, gatishmëri që të vijnë, mirëpo për shkak të kushteve hezitojnë,” tha Bajrami.
Në epokën e sotme digjitale, angazhimi i fëmijëve dhe të rinjve në kodim jo vetëm që u siguron atyre një kuptim themelor të shkencës kompjuterike dhe programimit, por gjithashtu rrit aftësitë e tyre për zgjidhjen e problemeve, arsyetimin logjik dhe të menduarit kritik. Inkurajimi i fëmijëve që të përfshihen në kodim është thelbësor për rritjen e tyre personale dhe suksesin e ardhshëm në botën digjitale./Katror.info
Edicionin #6 të plotë e gjeni KËTU 🙂
Kliko këtu dhe bonja Follow/pëlqeje Katror.info për me pa veç Lajme të Mira 🙂
Përgatiti:
