Sot nis edhe zyrtarisht fushata zgjedhore e partive politike për zgjedhjet parlamentare që do të mbahen më 9 shkurt 2025.
Partitë politike në vend sot hapjen e fushatës zgjedhore e ka caktuar kryesisht për në orët e mbrëmjes.
Partia që nis hapjen e fushatës në orët e paradites, saktësisht në 10:45 është Koalicioni AAK – Nisma – Konservatorët – Forumi Intelektual E-30 dhe Lista Ideal.
Mundesh me e lexu edhe…
Me rastin e nisjes së fushatës zgjedhore në Kosovë, nga ky koalicion kanë njoftuar se do të bëjnë nderime në memorialin e familjes Jashari në Prekaz.
Më pas në ora 16:30, Partia Demokratike e Kosovës hap zyrtarisht fushatën për zgjedhjet e përgjithshme të 9 shkurtit në sallën “1 Tetori”, Prishtinë, raporton Telegrafi.
Lidhja Demokratike e Kosovës (LDK) bën hapjen e fushatës zgjedhore në Pallatin e Rinisë, Prishtinë në ora 17:00.
Lëvizja Vetëvendosje hapjen e fushatës e bën në Gjakovë, në sallën e sporteve “Shani Nushi” në ora 18:00.
Ndërkaq, në ora 18:30 Koalicioni për Familjen hap zyrtarisht fushatën për zgjedhjet e përgjithshme.
Ditë më parë Komisioni Qendror i Zgjedhjeve mori vendim për certifikimin e Listës së Votuesve brenda dhe jashtë Kosovës për procesin e Zgjedhjeve për Kuvendin e Kosovës.
Sipas kësaj liste votuesish, numri i qytetarëve me të drejtë vote për këto zgjedhje është 2 milionë e 75 mijë e 868 votues.
Sipas të dhënave të KQZ-së, numri i qytetarëve me të drejtë vote në vendvotime, në Republikën e Kosovës, është: 1 milion e 970 mijë e 944 votues, ndërkaq, numri i qytetarëve që janë regjistruar për të votuar jashtë Kosovës, është 104 mijë e 924, shkruan Telegrafi.
Zëdhënësi i KQZ-së, Valmir Elezi në një prononcim për Telegrafin, kishte sqaruar pse numri i votuesve është më i madh se numri i banorëve.
Ai ka thënë se në listën e votuesve përfshihen edhe shtetasit e Kosovës me të drejtë vote brenda dhe jashtë vendit, ndërsa në regjistrimin e popullsisë kanë marrë pjesë vetëm banorët rezidentë.
“Lista Votuese dhe regjistrimi i popullsisë duhet të shikohen ndaras. Në regjistrimin e popullsisë janë të përfshirë vetëm banorët rezident të pranishëm në Kosovë në kohën kur është bërë regjistrimi, pra nuk përfshihen qytetarët që jetojnë jashtë vendit, ndërsa në Listën Votuese përfshihen shtetasit e Kosovës me të drejtë vote që jetojnë brenda dhe jashtë vendit”, ka thënë Elezi.
Në këto zgjedhje secili votues mund të votoj rreth 10 kandidatë të një partie politike për deputetë të Kuvendit të Kosovës.
KQZ po ashtu ka sqaruar se votimi me kusht është i përcaktuar vetëm në një qendër të votimit në një komunë dhe nuk mund të votohet në të gjitha qendrat.
Ndërkaq, në zgjedhjet parlamentare të 9 shkurtit KQZ fillimisht ka certifikuar grupin e parë prej 11 subjekteve politike me gjithsej 606 kandidatë për deputetë.
Lista e subjekteve politike dhe numri i kandidatëve të certifikuar deri më (18 dhjetor 2024) është: Lëvizja Vetëvendosje me 110 kandidatë, Partia Demokratike e Kosovës me 110 kandidatë, Lidhja Demorkatik e Kosovës me 110 kandidatë, Kosova Demokratik Turk Partisi me 25 kandidatë, Socijaldemokratska Unija me 40 kandidatë, Iniciativa e Re Demokratike e Kosovës me 41 kandidatë, Koalicija VAKAT me 48 kandidatë, Partia e Ashkalinjëve për Intergim me 35 kandidatë, Nova Demokratska Stranka me 46 kandidatë, Jedinstvena Goranska Partija me 29 kandidatë dhe Za Slobodu Pravdu i Opstanka me 12 kandidatë.
Paneli Zgjedhor për Ankesa dhe Parashtresa (PZAP) ka hedhur poshtë ankesën e Lëvizjes Vetëvendosje (LVV) që kërkonte anulimin e vendimit të Komisionit Qendror të Zgjedhjeve (KQZ) për certifikimin e Listës Serbe për pjesëmarrje në zgjedhjet e 9 shkurtit.
Sipas vendimit të PZAP-it, ankesa e VV-së u konsiderua e palejueshme, pasi nuk përmbushte kërkesat ligjore.
Me certifikimin e mëtejmë nga KQZ, në total numri i partive politike që marrin pjesë në zgjedhjet parlamentare është 27, ndërsa në listën e votimit është edhe një kandidat i pavarur.
Policia e Kosovës një ditë më parë bëri të ditur se ka finalizuar planifikimet dhe urdhrin operativ për të siguruar mbarëvajtjen e zgjedhjeve parlamentare që do të mbahen më 9 shkurt 2025.
Policia ka parashikuar masa të gjithanshme për të garantuar rendin dhe qetësinë gjatë këtij procesi demokratik.
Zgjedhjet e 9 shkurtit është bërë e ditur se do të monitorohen edhe nga ekipi i Bashkimit Evropian./Katror.info
Përgatiti:
