“Hamari i Hasit është Gjakova” – kështu shprehet Hasan Çaushi nga Nikoliqi i Hasit të Shqipërisë, i cili aktualisht ndodhet i shtruar në Spitalin e Gjakovës, ku po merr kujdesin mjekësor të nevojshëm për shkak të një sëmundjeje, shkruan KOHA.
Si ai, edhe shumë bashkëfshatarë të tij zgjedhin të trajtohen përtej kufirit të Shqipërisë, në Gjakovë, qyteti më i afërt me ta, ku për 3 muaj, mbi 1300 pacientë nga Shqipëria po marrin shërbime.
Shkak për këtë është mungesa e kushteve të duhura në institucionet shëndetësore të Hasit në Shqipëri, gjë që detyron banorët e zonës t’ia mësyjnë Kosovës që të kërkojnë ndihmë mjekësore.
Mundesh me e lexu edhe…
“Jam Hasjon. 20 kilometra larg prej Gjakovës jam. Po na presin mirë po na ndihmojnë me të gjithë kapacitetin që e kanë. Atje nuk kemi ambient, se njerëz të mirë kemi atje dhe po vijmë këtu se po na duket që po i sigurojmë ilaçet më shpejt. Këto shërbime, por janë më me fukarallëk se nuk kemi dhomë të hyjmë, duhet të presim 3 orë për të marrë një serum. E këtu si kam ardhur para tri ditë më kanë pritë 10 persona, më kanë futë brenda me ilaçe e të gjitha të mirat si të të kenë vëlla”, thekson Çaushi.
Edhe pse Tirana ofron më shumë mundësi shëndetësore, për banorët e veriut ajo mbetet larg dhe e paarritshme – jo vetëm në distancë, por edhe ekonomikisht.
“Këtu i marrim shumica, këtu i marrin të gjithë ata që i njohim. Doktori më tha me shkua në Tiranë e i thash që nëse më merr në dorë mirë që jo po shkojë në shtëpi e vdes se në Tiranë nuk i kam mundësitë të shkojë. Nuk po merremi vesh shumë atje, ka popullsi të madhe atje e nuk po merremi vesh. Ne gjithmonë kemi qenë me Gjakovën, jemi me të familjarizuar këtu. Krahina me Krahinë është. Nuk janë të zot me punua se e mund trefishin puna që e jep te na. Ndryshe kanë qenë përpara. Hasi bënte bukë për krejt Kuksin, ndërsa sot krejt fushat djerrë janë mbet”, deklaron Çaushi.
Sipas të dhënave të Spitalit të Gjakovës, vetëm në tremujorin e parë të këtij viti 1,300 pacientë nga Shqipëria kanë marrë shërbime ambulatore, 170 janë hospitalizuar, janë realizuar 228 seanca dialize dhe janë kryer 35 operacione. Për më tepër, 15 gra shtatzëna nga Shqipëria kanë zgjedhur të lindin fëmijët e tyre në këtë spital.
Edhe Kurt Mazreku, banor i Hasit, është i hospitalizuar në Spitalin e Gjakovës. Ai shprehet se spitali në zonën e tij nuk ofron kushtet e nevojshme, krahasuar me pajisjet dhe shërbimet që ofron Spitali i Gjakovës.
“Jam Kurt Mazreku, jam nga Hasi, kam punuar dhe jetuar gjithmonë brenda Hasit, nuk kam emigruar dhe sot jam pensionist. Arsyeja e ardhjes këtu është për arsye se ne e kemi më afër, është e pajisur me pajiset e duhura të sëmundjes të cilat ne atje nuk i kemi dhe vijmë në Gjakovë. Ju uroj që keni ardhur. Koha është ajo që e kërkon dhe kushtet që të jenë sa më të mira. Përshëndes edhe stafin mjekësor të këtij spitali në veçanti kardiologun që më shpëtoi jetën. Kam besim te Zoti dhe doktori që do të dalë”, thotë Mazreku.
Për shkak të një lëndimi në krah, shërbime në këtë spital po merr edhe Zyrana Bolli nga fshati Kostorr, i veriut të Shqipërisë.
“Arsyeja është se e kemi më afër. E kemi në Krumë por më afër Gjakovën. Janë më specialista se andej dhe komunikimi është i mirë, gjithçka është mrekulli. Jo nuk janë si këtu, këtu janë shërbimet më të mira”, deklaron Bolli.
Hilmi Shala, drejtori i Spitalit të Gjakovës, tregon se pacientët nga veriu i Shqipërisë janë të pranishëm çdo ditë.
Sipas tij, që nga përfundimi i luftës, shumë prej banorëve nga zona veriore e Shqipërisë janë drejtuar në Spitalin e Gjakovës.
“Afërsia gjeografike, pastaj zona e Krumës dhe Bajram Currit nuk kanë doktor të mjaftueshëm atje në këto momente qëndrojmë mirë me resurse humane. Tashmë është bërë edhe rregullimi i rrugëve, për 30 minuta kanë qasje të shërbimit shëndetësor”, thekson Shala.
Ai shton se trajtimi është i barabartë për të gjithë.
“Për neve është fluks normal duke e llogaritur periudhën e Covidit që kemi pasur shumë. Kemi staf të mjaftueshëm, numri i shtretërve është i madh. Besoj që ata kanë besim te mjekët tonë përderisa vijnë këtu. Trajtimi është i mirë, kujdesi shëndetësor është i mirë, nuk ka asnjë dallim. Kjo na obligon edhe për shkak të marrëveshjes që kanë në ministritë e dy shteteve dhe të gjitha shërbimet që i merr një qytetar nga Kosova, i merr edhe ai nga Shqipëria pa asnjë problem”, deklaron Shala.
Dializa u ofrohet pa pagesë edhe pacientëve nga Shqipëria, ndërsa për shërbimet e tjera ata paguajnë njësoj si qytetarët e Kosovës./Katror.info
Përgatiti:
