Në Klinikën e Kirurgjisë Vaskulare në Qendrën Klinike Universitare të Kosovës (QKUK), për herë të parë të shtunën është bërë stentimi i arterieve karotide.
Kjo arritje është bërë e mundshme falë bashkëpunimit qe ka Klinika e Kirurgjisë Vaskulare me Dr. Dimitrios Nikas nga Universiteti i Janines në Greqi, raporton KP.
Drejtori i Klinikës së Kirugjisë Vaskulare, Hajriz Rudari, ka treguar sesi është realizuar ky intervenim, dhe këtë trajtim mjekësor e ka quajtur një ditë historike për qytetarët e Kosovë, pasi që sipas tij po fillon një ditë e re e këtij procesi që deri më tani nuk ka qenë në vendin tonë.
Mundesh me e lexu edhe…
“Sot, është një ditë historike për shtetin e Kosovës, sepse po fillon një epokë e re e trajtimit që deri më tash nuk ka qenë në Kosovë. Sot, kemi pasur tre pacientë, të tre janë të gjinisë mashkullore, janë të moshës mbi 70-vjeçare. Pacienti i parë ishte pacientë i gjinisë mashkullore, 72 vjeçar, ka qenë me sëmundje kronike, të cilat na kanë imponuar që të bëhet kjo mënyrë e intervenimit. Intervenimi ka zgjatur rreth dy orë e gjysmë, sepse ka qenë patologjia e pacientit më e komplikuar se që kemi pritur, dhe kështu është realizuar me sukses”, tha ai.
Rudari ka treguar për pasojat e pacientit nëse nuk kish arritur të trajtohet sot në QKUK.
“Nëse pacienti nuk ish trajtuar, kish pësuar sulm ose edhe kish vdekur, po ashtu edhe kishte mundur me u paralizuar. Kjo është një preventivë e trajtimit të pacientit. Dhe çdo gjë ka shkuar sipas planit, pacienti është mirë”, theksoi ai.
Dr. Dimitrios Nikas nga Universiteti i Janines në Greqi, i cili mori pjesë në këtë intervenim në Prishtinë, theksoi se arteriet karotide dhe stenoza e arterieve karotide është një nga arsyet më kryesore se pse ndodhin infraktet. Sipas tij, fatkeqësisht është një nga arsyet se dikush mund të ketë një infrakt të madh.
Ai tha se intervenimi bëhet përmes vendosjes së stendës brenda arterieve pa pasur nevojë për operacion.
“Pra, deri në 1/20 e infrakteve ndodhin për shkak të stenozës karotide. Deri tani, kemi pasur këtë procedurë të popullarizuar dhe të pranuar të quajtur endarterektomi, e cila bëhej me kirurgji në arterinë karotide dhe ofronte përparësi të madhe për pacientin. Këto ditë kemi një metodë alternative të quajtur stentimi i karotideve, e cila bëhet përmes vendosjes së stendës brenda arterieve karotide të pacientëve, pa pasur nevojë për operacion. Të dhënat tregojnë se endarterektomia mund të jetë mënyra më e mirë për të trajtuar stenozën karotide, por në pacientë të zgjedhur stentimi karotid mund të bëjë të njëjtën punë me të njëjtin përfimit për pacienin tonë. Ofron më shumë rehati për pacientin, ai nuk ka nevojë për operacion, mund të qëndrojë në këmbë ditën tjetër dhe të largohet nga spitali. Ai ka nevojë vetëm për ca medikime për, le të themi, 2-3 muaj”, tha ai.
Ndërsa, doktori Lulëzim Vokrri tha se ky intervenim do të jetë vetëm hapi i parë dhe i ardhshëm që do të zhvillohet kirurgjia vaskulare në QKUK.
“Mendoj se do të jetë hap i parë dhe hap i ardhshëm që të zhvillohet kirurgjia vaskulare në Kosovë”, theksoi Vokrri.
Doktori Luan Jaha në këtë konferencë për media theksoi se pritet që së shpejti të fillohet me procedura të tjera të trajtimit në arteriet, si në arteriet e ekstremiteteve, në aortë.
“Është një ditë e rëndësishme për Kirurgjinë Vaskulare në Kosovë, sepse po e çojmë një kapitull të ri për mjekimin e sëmundjeve vaskulare… Ne presim që së shpejti me filluar edhe me procedura të tjera në arterie të tjera të ekstremitetit, në aorta”, tha ai.
Drejtori i Klinikës së Kirurgjisë Vaskulare, Hajriz Rudari më tej ka thënë se faktorët kryesor të kësaj sëmundje janë hiper tensioni, diabeti, yndyrërat e rritura, moshat e shtyra, si dhe trashëgimia.
Arteriet karotide janë dy arteriet kryesore që furnizojnë trurin me gjak dhe ndodhen në dy anët e qafës.
Ndryshe, projektin për këto intervenime të stentimit të arterieve karotide, e ka mbështetur Qeveria e Kosovës, përkatësisht Ministria e Shëndetësisë përmes Bankës Botërore./KP
Përgatiti:
