Studentët e Fakultetit Juridik të Universitetit të Prishtinës kanë arritur një sukses të jashtëzakonshëm, duke u renditur në vendin e gjashtë në mesin e universiteteve më prestigjioze botërore në garën ndërkombëtare “Nuremberg Moot Court 2025”, shkruan Katror.info.
Rundet finale të kësaj gare, që simulojnë procedurat e Gjykatës Penale Ndërkombëtare, janë zhvilluar nga 23 deri më 26 korrik në sallën historike nr. 600 të Gjykatës së Nurembergut, vend ku janë gjykuar figurat kryesore naziste pas Luftës së Dytë Botërore. Nga gjithsej 140 ekipe pjesëmarrëse nga mbarë bota, vetëm 40 u kualifikuan në rundet me gojë, përfshirë edhe ekipin e Universitetit të Prishtinës, i cili u rendit ndër gjashtë më të mirët në nivel global.
Ekipi përfaqësues i Fakultetit Juridik përbëhej nga studentet Morea Pula, Liza Rexhepi, Enxhi Avdyli, Rea Hadri dhe Greta Spahiu. Ata u mentoruan me përkushtim nga trajnerët Nisa Ferati – e cila i shoqëroi edhe në fazën finale në Nuremberg – si dhe nga Ass. Besnik Beqaj dhe Argjira Asllani, pjesëmarrëse e mëhershme në këtë garë. Mbështetje të vazhdueshme ekipit i ka dhënë edhe dekani i Fakultetit, Prof. Avni Puka.
Mundesh me e lexu edhe…
Ky sukses, sipas Fakultetit Juridik, konfirmon nivelin e lartë të përgatitjes akademike në fushën e së drejtës penale ndërkombëtare dhe përforcon pozitën e këtij institucioni si një qendër elitare në zhvillimin e juristëve të rinj në Kosovë.
“Nuremberg Moot Court” është një prej garave më të rëndësishme në botë për studentët e juridikut dhe që nga viti 2022 është bërë pjesë e përhershme e programit të Fakultetit Juridik të UP-së, duke u financuar nga buxheti i dedikuar për këtë qëllim./Katror.info
