Rritje e çmimeve, politikë, seancë konstituive, Trump, tarifa, rryma, protesta, mbrojtja, Rusi – Ukrainë… Cili është lajmi i fundit i mirë që ke lexuar?
Bëja këtë pyetje vetes më shpesh.
Gjersa titujt e portaleve në rrjete sociale po na vërshojnë, duke na ushqy shqetësim dhe ankth – nga përplasjet politike në Kosovë e deri te krizat globale – trupi, mendja dhe shpirti kanë nevojë për pushim.
Mundesh me e lexu edhe…
Në Kosovë, pas zgjedhjeve të mbajtura më 9 shkurt, dy tentime për ta konstituar Kuvendin kanë dështuar. Vendi ndodhet në ngërç institucional, ku as kryetari i Kuvendit nuk po mund të zgjidhet. Qytetarët po paralajmërojnë protesta për shkak të çmimeve gjithnjë në rritje dhe faturave të rrymës, ndërsa në rrafshin global tensionet gjeopolitike dhe ekonomike veç po thellohen. Tarifat mes SHBA-së dhe Kinës po kacafyten çdo ditë, e bisedat për “rendin e ri botëror” nuk po ofrojnë aspak qetësi.
Krejt këto, mos të keqkuptohemi, janë lajme që kanë rëndësi, por kur bombardohemi ditë për ditë e çast pas çasti, ne pavullnetshëm përqendrohemi vetëm te kjo anë e realitetit, ku pasoja më e drejtpërdrejtë është te shëndeti jonë mendor dhe fizik.
Po si ndikojnë lajmet e këqija në trup dhe mendje?
Një studim i publikuar në revistën British Journal of Psychology ka zbuluar se ekspozimi i vazhdueshëm ndaj lajmeve negative rrit ndjeshëm nivelet e stresit, ankthit dhe depresionit. Edhe nëse vetëm 3 minuta kemi ekspozim ndaj lajmeve të këqija në mëngjes, sipas një studimi nga Harvard Business Review, kjo mjafton që të ndikojë në disponimin negativ gjatë tërë ditës.
Ndërsa, Shoqata Amerikane e Psikologjisë (APA) ka raportuar se konsumimi i tepërt i lajmeve stresuese mund të shkaktojë, lodhje emocionale dhe ndjenjë të pafuqisë, rritje të nivelit të kortizolit (hormoni i stresit), probleme me gjumin, ankth social dhe frikë për të ardhmen.
Shprehia e leximit të pandërprerë të lajmeve negative në internet, e njohur si “doomscrolling”, është bërë veçanërisht e përhapur gjatë pandemisë. Ajo lidhet ngushtë me rritjen e niveleve të ankthit, depresionit dhe shqetësimeve të tjera shëndetësore. Studimet tregojnë se kjo sjellje mund të krijojë një cikël të pafund stresi dhe shqetësimi emocional, ku sa më shumë lajme të këqija lexon, aq më shumë ndihesh i pushtuar prej tyre – dhe megjithatë vazhdon të kërkosh më shumë.
Qysh me ia bo?
Lajme të mira ka, bile ma shumë sesa që ta merr mendja! Duhet veç pak përkushtim për me i kërku, pak reflektim, një refresh feed-it dhe algoritmit në rrjete sociale, kësisoj e zëvendëson politikën (jo krejtësisht, të kuptohemi, se duhet ta dimë edhe çka po ndodh), dhe në këtë formë e orienton fokusin drejt hapësirave që frymëzojnë – aty ku kultivohet kreativiteti, shpresa dhe aktivizmi frymëzues qytetar.
E nëse s’e di ku me ia fillu – fillo te Katror.info.
Ne ende po qëndrojmë stoik e s’po e lëshojmë bajrakun! Prej se kemi fillu më 20 shtator 2022, kemi mbërri edhe me iu informu, po edhe me iu frymëzu e relaksu.
Sepse, konsiderojmë se lajmet e mira s’janë vetëm informim – janë kujdes. Për veten. Për tjetrin. Për shoqërinë.
Herën tjetër kur të ndihesh i lodhur nga lajmet që të bombardojnë e vërshojnë, ndalu pak. Mendo. E shtroja vetes këtë pyetje:
Cili ishte lajmi i fundit i mirë që lexova?
Nëse nuk të kujtohet, ndoshta është koha t’i kthehesh platformës që të jep shpresë.
Te lajmet e mira.
Te njerëzit që bëjnë ndryshimin.
Te Katror.info.
Përgatiti:
